Hacı İbrahim Nehrəmli təyyarədə saxlanıb
«Yeni Müsavat» yazır ki, «oliqarxqeyt» işində adı keçən ən iri sahibkarlardan biri – «Avesta» konserninin rəhbəri olan Hacı İbrahim Nehrəmli mayın 13-də BMCQMİ-yə aparılandan sonra istintaqla aralarında razılaşma əldə edilib.
«Buna görə də ona saxlanılan digər sahibkarlardan fərqli münasibət göstəriblər, dindirmədən sonra azad ediblər. İşadamı sərbəst buraxılandan sonra mətbuata açıqlama verərək Beynəlxalq Bankdan götürdüyü kredit borclarını mayın 19-na qədər geri qaytarmaq öhdəliyi götürdüyünü açıqlamışdı. Belə görünürdü ki, Hacı İbrahim Nehrəmli Beynəlxalq Bankdan aldığı 78 milyonluq krediti geri qaytarmaq niyyətindədir.
Məlumata görə, bundan sonra Hacı İbrahim Nehrəmli ölkədən gizli yolla çıxmaq istəyib. O, Gəncə aeroportuna gedərək yaxın dostunun özəl təyyarəsi ilə Türkiyəyə uçmaq istəyib. Lakin təyyarəyə son anda uçuş icazəsi verilməyib. Təyyarədən düşürülən «Avesta» konserninin prezidentini Gəncədən birbaşa BMCQMİ-yə gətiriblər. Hacı İbrahim Nehrəmlinin barəsində məhkəmənin həbs qərarı verəcəyi gözlənilir».
Media icmalı AzadlıqLive-da
Qarabağ veteranı özünü yandırdı
Mayın 19-da özünü Cəlilabad rayon polis idarəsi qarşısında yandıran Qarabağ döyüşçüsü Mirtahir Mürsəlov xəstəxanada vəfat edib.
«Qazilər» saytının məlumatına görə, o, mayın 20-də səhər ağır yanıq dərəcəsi ilə Bakıdakı 5 nömrəli xəstəxanaya çatdırılıb. Həkimlər yaşamaq şansının olmadığını bildriblər.
Onun məmur özbaşınalığına etiraz olaraq özünü yandırdığı deyilir. Bir neçə gün öncə Cəlilabadda başqa bir Qarabağ döyüşçüsü də özünü asmışdı. AzadlıqLive-da
İlham Əliyev ekspertizanın keçirilməsinə, təhlükə olduğu halda üzlüklərin dərhal sökülməsinə göstəriş verib
Binəqədidə baş verən yanğınla əlaqədar yaradılan Dövlət Komissiyasının Azərbaycan prezidentinin rəhbərliyi ilə ilk iclası keçirilib. APA-nın məlumatına görə, Dövlət başçısı hadisə zamanı həlak olanların ailələrinə bir daha başsağlığı verib. Hadisə qurbanlarının xatirəsi bir dəqiqəlik sükutla yad olunub.
Sonra prezident yanğının nəticələrinin aradan qaldırılması üçün dövlət səviyyəsində görülən tədbirlərdən danışıb. Dövlət başçısı hadisənin baş verməsində təqsirli bilinən şəxslər barədə cinayət işinin qaldırıldığını və onların ciddi şəkildə cəzalandırılacağını deyib. Prezident bildirib ki, yanğının baş verməsinin ilkin versiyası binanın keyfiyyətsiz və oda davamsız materiallarla üzlənməsidir. Hazırda paytaxtda oxşar materiallarla üzlənmiş binaların kifayət qədər çox olduğunu diqqətə çatdıran dövlət başçısı Bakı Şəhər İcra Hakimiyyətinə və Fövqəladə Hallar Nazirliyinə oxşar materiallarla üzlənmiş binalarda ekspertizanın keçirilməsi, materialların tərkibinin öyrənilməsi, təhlükə olduğu halda həmin binaların üzlüklərinin dərhal sökülməsi barədə konkret göstərişlərini verib.
İlham Əliyev Riqa sammitinə getmir
Avropa İttifaqı (Aİ) Şurasına sədrlik edən Latviya mayın 21-22-də Riqada «Şərq tərəfdaşlığı» (ŞT) Proqramının üzvü olan ölkələrin sammitini keçirəcək.
Sammitdə Aİ-nin 28 ölkəsinin və «Şərq Tərəfdaşlığı»na daxil olan 6 dövlətinin təmsilçiləri rəhbərliyi iştirak edəcəklər.
Avropa İttifaqının «Şərq Tərəfdaşlığı» layihəsi 2009-cu ildə Praqada Ukrayna, Moldova, Azərbaycan, Ermənistan, Gürcüstan, Belarusa təqdim olunub. Layihə Avropa İttifaqının bu altı keçmiş SSRİ ölkəsi ilə inteqrasiyasının inkişafını nəzərdə tutur.
Azərbaycan Aİ-yə inteqrasiyada ən az iş görən ölkələr sırasındadır.
Azərbaycan prezidenti İlham Əliyev Riqa sammitinə getməyəcıək. Bunu onun köməkçisi Əli Həsənov deyib.