Yüzlərlə bakılı yanan binanın önünə güllər, uşaq oyuncaqları gətirib
Mayın 21-də yüzlərlə bakılı “Azadlıq” prospektində yanan binanın yanına gələrək faciə zamanı həlak olanların xatirəsinə qərənfillər, uşaq oyuncaqları qoyurlar. Əvvəlcə polis bu kortəbii aksiyaya mane olmaq istəyib. Lakin vətəndaşların etirazları ilə qarşılaşan polislər müdaxilə etməyərək kənardan baxıblar.
"İdman tədbirləri avtoritar rejimlərin oyuncağına çevrilib"
“Foreign Policy” dərgisi Pen Amerika Mərkəzinin icraçı direktoru Suzanne Nossel-in “Daha sürətli, daha yüksək, daha oppressiv” başlıqlı məqaləsini dərc edib. Nossel vaxtilə ABŞ Dövlət katibinin beynəlxalq təşkilatlar üzrə müavininin köməkçisi işləyib. Müəllif Olimpiya oyunları kimi meqa idman tədbirlərinin avtoritar rejimlərin oyuncağına çevrilməsindən yazır. “İnsan haqları pozuntularına işıq salmaq üçün çoxmu gecdir?” deyə sual edir.
“Bu ilin aprelində Bəhreyndə Formula 1 yarışı bitən kimi təşkilatçılar elan etdilər ki, 2016-cı ildə yarışma Bakıda keçiriləcək. Təsadüfi deyil ki, 2016-cı il Yay Olimpiya Oyunlarına bir növ yaz təlimi olan birinci Avropa Oyunları da Bakıda olacaq. 2022-ci il Qış Olimpiadasına ev sahibliyinə iddialılar içində Almaty və Pekin var. 2018-ci il Dünya Futbol çempionatı Rusiyada keçiriləcək, 2022-ci ildə isə Qatarda”.
Müəllif yazır ki, beynəlxalq idman yarışlarının repressiv rejimlərdə keçirilməsi tendensiyasını görməmək mümkün deyil. Bu tendensiya davam edərsə, siyasətdən uca durmağa çalışan meqa idman tədbirləri siyasi topa çevrilə bilər – Beynəlxalq Olimpiya Komitəsi (BOK) və uyğun hökumət qurumları bu topu bir avtoritar rejimdən digərinə ötürürlər. BOK, sponsorlar, hökumətlər həmin yarışların tiranların yürüşünə çevrilməsinə əngəl olmalıdırlar.
Müəllif Azərbaycanda oyunlar öncəsi onlarla fəalın, jurnalistin siyasi motivli ittihamlarla həbsə atılmasından yazır. Hakimiyyət onların azad olunmasına dair beynəlxalq çağırışları qulaqardına vurub.
“BOK-un etika, mədəniyyət və marketinq məsələləri üzrə komissiyaları var. Qurum insan haqları üzrə yeni komissiya yaratmalıdır, yeni, daha sərt tələblər hazırlamalıdır,” müəllif yazır.AzadlıqLive-da
Tacikistan Gülen məktəblərini bağlayır
“Dailysabah.com” yazır ki, ABŞ-da yaşayan din xadimi Fethullah Gülen-in idarə etdiyi məktəblər Tacikistanda bağlanır. Bu məktəblər başqa ad altında, dövlət tərəfindən idarə olunacaq. Bunu Tacikistanın Təhsil və Elm naziri Nuriddin Said deyib.
Nazirin sözlərinə görə, ilin əvvəlində istintaq altında olan məktəblərin bağlanması üçün nazirlik bütün gərəkən hüquqi sənədləri hazırlayıb. Növbəti dərs ilindən Gülen məktəbləri dövlət məktəblərinə çevriləcək. Onların təhsil sistemi, kurrikulumunda da dəyişikliklər olunacaq.
Məktəblərin təsisçisi olan “Şəlalə” (Selale) şirkəti də statusunu itirəcək.
Tacikistanda ilk Gülen məktəbi 1992-ci ildə açılıb. Türkiyə hökuməti Guleni ölkə daxilində polis, ədliyyə, administrasiya olmaqla, əsas müəssisələrə nüfuz etməkdə günahlandırır.AzadlıqLive-da
İrlandiya eyni cinsdən olanların nikahına münasibət bildirir
Mayın 22-də İrlandiya eynicinsli nikahlara icazə verilib-verilməməsi üzrə referendum keçirir.
Bu islahatı bütün siyasi partiyalar, böyük sahibkarlar, tanınmışlar dəstəkləyir. Opponentlər isə əsasən kilsə liderləridir, gey cütlüklərin valideynlik, surroqat hüquqları məsələlərini qaldırırlar.
Rəy sorğuları təklifin keçəcəyini göstərir.
Katolik ölkəsi olan İrlandiya 1995-ci ildə nikahı leqallaşdırıb.
ABŞ-ın bir sıra ştatlarında, Braziliya, Fransa, Yeni Zelandiya, Britaniya və digər ölkələrdə gey nikahları qəbul olunub. Ancaq heç birində bu, referendum yoluyla edilməyib.