Dövlətə xəyanətdə suçlanaraq 16 il həbsə məhkum edilmiş Fəxrəddin Abbasovun ailə üzvləri təxminən bir aydır ki, ondan heç bir xəbər ala bilmədiklərini deyir. Bu barədə AzadlıqRadiosuna danışan qardaşı Araz Abbasovun sözlərinə görə, onun ailəsi ilə telefon danışıqlarına da məhdudiyyət qoyulub: "Çox nigaranıq. Heç bir xəbər yoxdur ondan. Nə qədər cəhd eləsək də, bir xəbər ala bilmirik. Bircə kəlmə səsini eşidib bilərdik ki, salamatdır. Başqa heç nə istəmirik".
Qardaşının sözlərinə görə, F.Abbasovla sonuncu dəfə mart ayında danışıblar.
Uzun müddət Rusiyada yaşamış F.Abbasov 2019-cu ilin fevralında orada tutularaq Bakıya gətirilib. Hava limanından birbaşa Dövlət Təhlükəsizliyi Xidmətinin (DTX) binasına aparılan F.Abbasov təxminən bir il orada saxlanılıb. Bu ilin fevralında Bakı Ağır Cinayətlər Məhkəməsi onun haqqında hökm çıxarıb və bundan bir müddət sonra o, Kürdəxanıya - Bakı İstintaq Təcridxanasına köçürülüb.
A.Abbasov deyir ki, qardaşı haqda məlumat almaq üçün Kürdəxanıya da gedib: "Siqaret və hesabına qoymaq üçün pul aparmışdım. Qapıdakı işçilər məsul şəxslərdən birinə zəng elədi, danışdım. Dedilər ki, buradadır, narahat olmayın, evə zəng eləyəcək. Eləmədi. Üstündən bir aya yaxın vaxt keçib, xəbər yoxdur".
'Telefon danışığı hüququ qüvvəsindədir'
Penitensiar Xidmətin İctimaiyyətlə əlaqələr şöbəsinin rəhbəri Mehman Sadıqov AzadlıqRadiosuna bildirib ki, həbs yerlərində saxlanılan şəxslər qanunun verdiyi hüquqlarından istifadə edə bilirlər: "Koronavirusa qarşı mübarizə tədbirləri çərçivəsində görüş və sovqat qəbuluna qadağa var. Amma telefon danışığı hüququ qüvvəsindədir. Kimliyindən asılı olmayaraq, Penitensiar Xidmətin tabeliyindəki müəssisələrdə saxlanılan şəxslərin qanunvericilikdə nəzərdə tutulan hüquqları təmin edilir".
Ermənistanın xüsusi xidmət orqanlarıyla əməkdaşlıqda suçlanan F.Abbasov özünü təqsirli bilmir. O, ifadəsində Ermənistanda konfransda iştirakını təsdiqləsə də, bu ölkənin xüsusi xidmət orqanlarıyla əməkdaşlıq etmədiyini deyib. O, ermənilərlə işbirliyində olan başqa şəxslər arasında vasitəçilik etməsi haqda ittihamı da qəbul etməyib.
2002-2005-ci illərdə Sankt-Peterburqda "Toliş" qəzetinin baş redaktoru olduğunu deyən F.Abbasovun sözlərinə görə, qəzetdə talışların tarixi, mədəniyyəti, folkloru, dili, adətləri, mətbəxi haqda məqalələr çap edib.
F.Abbasov haqqında hökmdən apellyasiya şikayəti verilib.
