General xilas edilib
Türkiyə Silahlı Qüvvələrinin Baş Qərargah rəisi Hulusi Akar girovluqdan azad edilib.
Bu məqsədlə onun saxlanıldığı Akıncılar hərbi bazasında xüsusi əməliyyat keçirilib.
NTV onun etibarlı bir yerə aparıldığını xəbər verir.
Türkiyə Hava Qüvvələrinin bazası olan Akıncı Ankaradan 35 km aralıda yerləşir.
Tava vs. Tank
Ölkə, deyəsən, ötən gecədən sonra özünə gəlir. Sosial şəbəkələrdə artıq zarafatlaşırlar. «Buna bax e, əlində tavalar tutan xalq tank və vertolyotla gələn xuntadan daha çox tab gətirdi :)» - uzun müddət İstanbulda yaşamış bir qız yazır.
Azərbaycan XİN-dən Türkiyə hadisələrinə reaksiya
Bəyanatda qonşu ölkədə baş verənlər «demokratik yolla Türkiyə xalqının seçdiyi hökumətə qarşı bir qrupun etdiyi çevriliş cəhdi» adlandırılır: «Türkiyə milləti və dövləti birlik və bərabərlik nümayiş etdirərək, buna qarşı çıxmışdır».
Bəyanatda Azərbaycanın Türkiyə xalqı və dövlətinin yanında olduğu bəyan edilir, tezliklə vəziyyətin tam sabitləşəcəyinə və normallaşacağına əminlik ifadə olunur.
Türkiyədə hərbi çevrilişə cəhddən sonra 754 hərbçi saxlanılıb, - deyə "Anadolu" dövlət agentliyi bildirir.
NTV televiziyası isə daxili işlər nazirinin qərarı ilə 5 general və 29 polkovnikin xidmətdən kənarlaşdırıldığını xəbər verir.