Azərbaycan xəbərləri
'Zaminbank' işçilərinə hökm oxundu
![2016-cı ildə «Zaminbank»ın lisenziyası ləğv olunub](https://d1fo9srdmi2xgc.cloudfront.net/42a27081-3ca9-4bd6-bfad-e5ccb5a6e910_w250_r1_s.jpg)
«Zaminbank»ın dörd nəfər vəzifəlisi xeyli vaxtdır ki, Bakı Ağır Cinayətlər Məhkəməsində mühakimə olunurdu. Onlar bankın 1 milyon 337 min manat pulunu mənimsəməkdə suçlanır.
Hakim önünə çıxarılan dörd nəfərdən Şahin İlyasov «Zaminbank»ın Sumqayıt filialının rəhbəri olub. Bundan öncə isə o, Maliyyə Nazirliyində işləyib. Anar Osmanov bankın xəzinə şöbəsinin müdiri, Zərifə Tağıyeva xəzinədar, Anar Həsənov isə kredit şöbəsinin əməkdaşı olub. İddia olunur ki, adları çəkilən şəxslər bankın pullarını müxtəlif adamların adlarına kredit kimi rəsmiləşdirməklə mənimsəyiblər.
Amma onlar özlərini təqsirli bilmirlər. Deyirlər ki, sənədləşdirilən kreditlər formal yox, gerçək olub. Onlar həmin kreditləri götürənlərin ödəməyəcəklərini öncədən bilməyiblər. Buna baxmayaraq, dəymiş ziyanı ödəyiblər - bankın pulunu qaytarıblar. «Zaminbank»ın nümayəndəsi də məhkəmədə təsdiqləyib ki, təqsirləndirilən şəxslər 1 milyon 337 min manatı ödəyiblər: «Amma müqavilə öhdəlikləri üzrə hələ də borc qalır».
Prokuror sabiq filial müdiri Ş.İlyasovun 6 il azadlıqdan məhrum edilməsini istəmişdi.
Təqsirləndirilən şəxslər istintaq və məhkəmə dövründə həbsdə olmayıb. Prokuror Ş.İlyasovun məhkəmə zalından həbs olunmasını təklif etmişdi.
Dövlət ittihamçısı digər üç təqsirləndirilənə isə 5 il şərti cəza verilməsini uyğun sayıb.
Məhkəmə ziyanın ödənilməsini əsas gətirib, təqsirləndirilənlərin hamısına şərti cəza kəsib.
Bütün xəbərləri izləyin
Anar Məmmədli səhhətində problemlər yarandığını bildirir
![Anar Məmmədli](https://d1fo9srdmi2xgc.cloudfront.net/7BE4FF5F-8EBB-41AB-8D95-53458D0DE4B8_w250_r1_s.jpg)
Seçkilərin Monitorinqi və Demokratiyanın Tədrisi Mərkəzinin (SMDT) həbsdə olan rəhbəri Anar Məmmədli səhhətində problemlər yarandığını bildirib. Bu barədə müdafiə tərəfi açıqlama yayıb.
Vəkil Elçin Sadıqov bilirib ki, oktyabrın 14-də 1 saylı Bakı İstintaq Təcridxanasında A.Məmmədli ilə görüşüb.
Onun sözlərinə görə, A.Məmmədli belində, boğazında ağrılardan və baş gicəllənməsindən əziyyət çəkdiyini söyləyib.
E.Sadıqov qeyd edib ki, Anar Məmmədlinin müayinəsi və zəruri analizlərinin götürülməsi ilə bağlı hələ ötən həftədən göndərdikləri müraciətlərə isə heç bir cavab verilməyib: "Anar Məmmədlinin yazdığı müraciətləri Penitensiar Xidmətinə, Ədliyyə Nazirliyinin Baş Tibb İdarəsinə, istintaqı aparan Daxili İşlər Nazirliyinə və Ombudsman Aparatına göndərmişdik, hələlik, heç bir cavab gəlməyib, müayinə aparılmayıb".
Müdafiə tərəfinin açıqlamasına Ədliyyə Nazirliyinin Baş Tibb İdarəsi və başqa sözügedən qurumlardan da ayrılıqda münasibət öyrənmək mümkün olmayıb.
A.Məmmədli bu il aprelin 29-da saxlanıb. Aprelin 30-da Xətai rayon Məhkəməsi onun barəsində həbs qətimkan tədbiri seçib.
A.Məmmədli Cinayət Məcəlləsinin 206.3.2-ci (qaçaqmalçılıq, əvvəlcədən əlbir olan bir qrup şəxs tərəfindən törədildikdə) maddəsi ilə ittiham olunur. O, ittihamı qəbul etmir.
SMDT rəhbəri A.Məmmədli bundan əvvəl 2013-cü ilin sonlarında saxlanmışdı. O, həmin vaxt vergidən yayınma və başqa ittihamlar ilə 5 il 6 ay müddətinə həbs edilmişdi. Amma onda da ittihamları qəbul etməyib. Bir sıra yerli və beynəlxalq təşkilatlar onu siyasi məhbus kimi tanıyıblar.
Məmmədli 2016-cı il martın 17-də əfv sərəncamı ilə azadlığa buraxılmışdı.
Qaçaqmalçılıq ittihamı…
Ümumilikdə ötən ilin noyabrından başlayaraq Azərbaycanda qruplar halında 20 civarında jurnalist, ictimai fəal qaçaqmalçılıq ittihamı ilə həbs edilib. Sonra onların bəzilərinin ittihamı daha bir neçə maddə ilə ağırlaşdırılıb. Söhbət külli miqdarda gəlir əldə etməklə qanunsuz sahibkarlıqdan, habelə mütəşəkkil dəstə ilə qaçaqmalçılıqdan, vergidən yayınmaqdan, sənəd saxtalaşdırma və saxta sənədlərdən istifadədən gedir. Amma onların hamısı ittihamla razılaşmır, bunu peşə fəaliyyətləri və siyasi sifariş ilə izah edirlər.
Yerli hüquq-müdafiə təşkilatlarının hazırladıqları siyahılara görə, hazırda Azərbaycan həbsxanalarında təqribən 300 siyasi məhbus var. Rəsmilər isə bir qayda olaraq vurğulayırlar ki, ölkədə heç kim sırf peşə fəaliyyəti ilə bağlı, siyasi əsaslar ilə həbs edilmir.
7 nəfərin xəstəxanada müalicəsi davam edir
![Dönər](https://d1fo9srdmi2xgc.cloudfront.net/31EDC705-F084-47DD-8363-610ABA68B56C_cx0_cy14_cw0_w250_r1_s.jpg)
Tibbi Ərazi Bölmələrini İdarəetmə Birliyindən (TƏBİB) bildirilib ki, oktyabrın 14 -15-də müxtəlif saatlarda 21 nəfər zəhərlənmə şübhəsi ilə Tovuz Rayon Mərkəzi Xəstəxanasının təcili yardım şöbəsinə yerləşdirilib: "Onların hər birinə zəruri tibbi xidmətlər göstərilib. Hazırda xəstəxananın yoluxucu xəstəliklər şöbəsində 7 nəfərin müalicəsi davam edir, vəziyyətləri qənaətbəxş qiymətləndirilir. Digər şəxslər isə ambulator müalicə üçün evə buraxılıb".
Tovuzda 18 nəfərin dönərdən zəhərləndiyi güman edilir
Tovuz rayonunda 18 nəfərin qidadan zəhərləndiyi ehtimal edilir.
Baş Prokurorluğun mətbuat xidmətindən bildirilib ki, oktyabrın 15-də 18 nəfərin Tovuz rayonunda fəaliyyət göstərən bir iaşə obyektindən aldıqları dönərdən zəhərlənmələri şübhəsi ilə Rayon Mərkəzi Xəstəxanasına müraciət etmələri ilə bağlı araşdırma aparılır.
Açıqlamaya görə, Azərbaycan Qida Təhlükəsizliyi Agentliyi əməkdaşlarının iştirakı ilə həmin iaşə obyektindəki qidalardan nümunələr götürülərək müvafiq ekspertizalar təyin edilib. Sözügedən müəssisənin fəaliyyətinin də məhdudlaşdırıldığı bildirilir.
Hələlik, rəsmi acılamaya zərərçəkənlərin və iaşə obyektinin təmsilçilərindən münasibət almaq mümkün olmayıb.
+++
Son vaxtlar Azərbaycanda belə oxşar hadisələr vaxtaşırı baş verməkdədir.
Beş gün öncə, oktyabrın 11-də Bakı Dövlət Universitetinin Qazax filialının 18 tələbəsinin qida zəhərlənməsi şübhəsi ilə rayon xəstəxanasına yerləşdirildiyi açıqlanmışdı. Bu il avqustun 15-də isə Qəbələ rayonunda xəstəxanaya kütləvi müraciət olmuşdu. Yerli sakinlərin bildirməsinə görə, səhhətləri ağırlaşan insanlar rayonda bir toy məclisində iştirak ediblər. Onda ümumilikdə 50-dən çox şəxsin səhhətinin pisləşdiyi deyilirdi.
Ondan dörd gün əvvəl isə Gəncə şəhərində bir yas mərasimindən sonra yüzdən çox şəxsin səhhətinin ağırlaşdığı açıqlanmışdı. Onların da qidadan zəhərləndiyindən bəhs edilirdi.
İnternet azadlığına görə Azərbaycan Belarus, İraq və Zimbabve ilə bir yerdədir
!["Freedom House"a görə, dünyada internet azadlığı](https://d1fo9srdmi2xgc.cloudfront.net/4f903be8-153c-4d3f-a55f-9238c5b1abdb_w250_r1_s.png)
Dünyada internet azadlığı 14-cü ildir ardıcıl geriləyir. Senzura və kontentin manipulyasiyası seçicilərin dünyadakı seçkilərlə bağlı bilgili qərarlar vermə bacarığına zərbə vurub. Bunu "Freedom House" insan haqları təşkilatı 2023-cü ilin iyunundan 2024-cü ilin mayınadək olan dövrə aid hesabatında bildirir.
"İnternet azadlığı 2024" adlı hesabatın əhatələdiyi 72 ölkədən 27-sində onlayn insan haqlarının müdafiəsinin zəiflədiyi, 18-sində isə təkmilləşdiyi bildirilir.
100 bal internetin ən azad, 0 isə ən az azad olduğu ölkə deməkdir. 100-70 xal yığan ölkələr AZAD, 69-40 xal QISMƏN AZAD, 39-0 xal yığanlar isə QEYRI-AZAD ölkələr sayılıblar.
Reytinqin necə hesablanmasına gəlincə, burada internetə çıxışa əngəllər, kontentə məhdudiyyətlər və istifadəçi hüquqlarının pozulması nəzərə alınıb.
Azərbaycan və qonşuları
Azərbaycan 34 xalla yenə "qeyri-azad" ölkələr sırasında yer alıb, ötən illə müqayisədə 3 xal itirib. Belarus, İraq və Zimbabve Azərbaycanla bir sırada yer alıblar, 3 xal az qazanıb. Ən böyük düşüşü isə 4 xal geriləmə ilə Qırğızıstan əldə edib.
Azərbaycanın qonşularından Rusiya, Türkiyə, İran "qeyri-azad" ölkələr sırasındadır.
Gürcüstan və Ermənistan isə 74 xalla "azad" ölkələr kateqoriyasına salınıb.
Hesabatda deyilir ki, 2023-cü ilin sentyabrında Qarabağda hərbi əməliyyat zamanı Bakıda bir neçə nəfər, o cümlədən keçmiş diplomat Emin İbrahimov bir aylığa saxlanılıb. Buna əməliyyatı tənqid edən, yaxud münaqişənin dinc həllinə çağıran sosial media postları səbəb olub.
Rəsmi Bakı sözügedən hərbi əməliyyatla ərazi bütövlüyünü bərpa edib. Bundan sonra Qarabağdan ermənilərin kütləvi köçü başlanıb. Ermənistan bunu "etnik təmizləmə" adlandırsa da, Bakı iddiaları rədd edib, ermənilərə reinteqrasiya planı təqdim etdiyini bildirib.
Keçmiş diplomat E.İbrahimov isə bu ilin iyulunda, bu dəfə xuliqanlıq ittihamı ilə saxlanılıb. Özü ittihamı qurama sayır.
Seçkilər necə manipulyasiya edilir
"Freedom House" onu da qeyd edir ki, avtoritar ölkələrdə hökumətyönlü şərhçilər səfərbər olunaraq "biabırçı" saxta seçkiləri azad və ədalətli kimi qələmə veriblər. Azərbaycanın da bu ilin fevralında keçirilən növbədənkənar prezident seçkisinə bütün dünyadan kontent yaradıcılarını dəvət etdiyi, onların səyahət və Bakıda qalma xərclərini çəkdiyi vurğulanır. Deyilir ki, həmin seçki prezident İlham Əliyevin qələbəsi üçün sərt manipulyasiya edilib, saxta seçki müşahidə missiyalarını maliyyələşdirməklə seçkiyə legitimlik donu geyindirilib.
Azərbaycan rəsmiləri bu hesabata, hələlik, münasibət açıqlamayıblar. Ancaq "Freedom House", eləcə də digər insan haqları qurumlarının daha öncəki hesabatları sərt tənqid olunub, bu qurumlar Azərbaycana qarşı koordinasiyaları fəaliyyətdə ittiham ediliblər.
Bu il ölkədə növbədənkənar parlament seçkiləri də keçirilib. Hakimiyyət hər iki seçkinin demokratik keçdiyini desə də, ATƏT DTİHB seçkilərin məhdudlaşdırıcı, rəqabətsiz mühitdə gerçəkləşdirildiyini bildirib. Müstəqil müşahidəçilər və media qurumları çoxsaylı pozuntuları qeydə alıblar.
Hesabatda Avrasiyada internet azadlığının gerilədiyi, Rusiyanın 20 xalla regionda ən az xalı qazandığı vurğulanır. Kremlin Ukraynaya qarşı tammiqyaslı işğalı isə bu ölkədə internet azadlığına zərbə vurub, belə ki, Rusiya ordusu internet infrastrukturunu dağıdıb, işğal etdiyi ərazilərdə təkmil senzura rejimi qurub.
Myanma və Çin dünyada internet azadlığı üçün ən pis mühitin olduğu ölkələr sayılıb.
Lənkəranın icra başçısına sui-qəsdin qarşısının alındığı bildirilir
![Taleh Qaraşov](https://d1fo9srdmi2xgc.cloudfront.net/5ed05f90-4df9-4ce1-b394-b14d11b951b8_cx0_cy18_cw0_w250_r1_s.jpg)
Lənkəranın icra başçısı Taleh Qaraşova qarşı sui-qəsd hazırlandığı, ancaq qarşısının alındığı iddia olunur. Buna görə suçlanan Bəhruz Əsgərov oktyabrın 15-də məhkəmə önünə çıxarılıb. İşə Bakı Ağır Cinayətlər Məhkəməsində baxılır.
B.Əsgərovun 36 yaşı var. O, qəsdən adam öldürməyə cəhddə, ictimai-siyasi xadimin həyatına sui-qəsddə, terrora hazırlıqda suçlanaraq 7 aydan çoxdur Dövlət Təhlükəsizliyi Xidmətinin İstintaq Təcridxanasında saxlanılır.
Oktyabrın 15-də B.Əsgərovun vəkili məhkəmədə vəsatət qaldıraraq onun DTX-dan Penitensiar Xidmətin Kürdəxanı qəsəbəsində yerləşən Bakı İstintaq Təcridxanasına köçürülməsini istəyib.
Hakimlər vəsatəti təmin edib.
B.Əsgərov icra başçısı ilə yanaşı, cənub bölgəsində fərdi qaydada ingilis dili müəllimi çalışan əcnəbi Lin Terriyə (Lynn Terry) qarşı sui-qəsdin təşkilində də suçlanır. Bu üzdən Qaraşovla yanaşı, o da zərərçəkmiş qismində tanınıb.
Cinayət işinin materiallarında iddia edilir ki, B.Əsgərov icra başçısını güdməkdən, onu və əcnəbi müəllimi öldürməkdən ötrü müxtəlif adamlarla danışaraq onlara tapşırıqlar verib.
B.Əsgərova ittiham verilən maddələrdə 20 ilədək və ya ömürlük həbs cəzası nəzərdə tutulub. Onun istintaqa ifadəsində özünü təqsirli bildiyi göstərilib. Məhkəmədə isə hələ sərbəst ifadə verməyib.
Əliyev Ermənistanın sülh sazişi ilə bağlı təklifini reallıqdan kənar sayır
![Prezident İlham Əliyev Belçika Krallığının Azərbaycanda yeni təyin olunmuş fövqəladə və səlahiyyətli səfirinin etimadnaməsini qəbul edib](https://d1fo9srdmi2xgc.cloudfront.net/7c69984d-0bce-4f1b-b385-88cbf4709487_cx0_cy7_cw0_w250_r1_s.jpg)
"Sülh müqaviləsinin bütün bəndləri eyni dəyərə malikdir, birini digərindən ayırmaq olmaz".
AZƏRTAC-ın xəbərinə görə bunu oktyabrın 14-də prezident İlham Əliyev Belçika Krallığının Azərbaycanda yeni təyin olunmuş fövqəladə və səlahiyyətli səfiri Julyen de Freponun etimadnaməsini qəbul edərkən deyib.
"Prezident İlham Əliyev bu baxımdan Ermənistan hökumətinin "bu vaxtadək nə barədə razılaşdırılıbsa, ona imza atılsın, razılaşdırılmamış müddəalar növbəti mərhələlərə saxlanılsın" təklifini tamamilə reallıqdan kənar hesab etdiyini bildirdi və bu cür yanaşma presedentinin ona məlum olmadığını vurğuladı", - xəbərdə əlavə edilir.
Ermənistan rəsmiləri son aylar dəfələrlə bəyan ediblər ki, onlar sülh sazişinin tezliklə bağlanmasına tərəfdardırlar. Baş nazir Nikol Paşinyan sentyabrın 26-da BMT Baş Assambleyasındakı çıxışı zamanı bunları demişdi: "Azərbaycan prezidenti və mən dəfələrlə qeyd etmişik ki, qeyd olunan sazişin ən azı 80 faizi razılaşdırılıb. İndi Ermənistan bu tarixi fürsətdən yararlanmaq və dalana dirənmək riskindən qaçmaq üçün əvvəllər razılaşdırılmış hissələr üzrə Sülh Sazişi bağlamağı, sonra isə qalan məsələlər üzrə danışıqları davam etdirməyi təklif edir".
Son bir neçə ildə hər iki ölkə arasında həm Avropa İttifaqı, həm də Rusiyanın vasitəçiliyi ilə ayrı-ayrılıqda danışıqlar aparılsa da, hələlik, sülh sazişi imzalanmayıb. Danışıqların detalları açıqlanmır. Ötən ildən başlayaraq isə tərəflər sərhədlərin delimitasiyası ilə bağlı birbaşa danışıqlara başlayıblar.
Xatırlatma
1990-cı illərin əvvəllərində Qarabağ münaqişəsi Azərbaycan və Ermənistan arasında toqquşmalara səbəb olub. Azərbaycanın Qarabağ bölgəsi, ətraf 7 rayonu işğal edilmişdi. Amma 2020-ci ildə 44 günlük müharibə və ötən il birgünlük hərbi əməliyyat nəticəsində Bakı bütün ölkə ərazisində suverenliyin bərpa edildiyini açıqlayıb.
Rəsmi Bakı ötən il birgünlük hərbi əməliyyatları "lokal antiterror tədbirlər" elan etsə də, Yerevan onu "etnik təmizlənmə" kimi dəyərləndirib. Daha sonra da Qarabağdan Ermənistana əhali köçü olmuşdu.
Qarabağdakı tanınmayan qurumun rəhbəri 2024-cü ilə qədər bu qurumun fəaliyyətini dayandıracağını açıqlamışdı. Amma indi bununla bağlı Yerevandan ziddiyyətli bəyanatlar eşidilir.
Podesta: Dövlət Departamentinin konqresmenlər adından məktub yazması ilə bağlı iddialar əsassızdır
![Con Podesta](https://d1fo9srdmi2xgc.cloudfront.net/794A4119-D95F-4013-80DE-AE59919EB6E1_w250_r1_s.jpg)
ABŞ prezidentinin iqlim siyasəti üzrə baş müşaviri Con Podesta (John Podesta) insan haqlarının müdafiəsi üçün Azərbaycan hakimiyyətinə təzyiqlərə çağıran məktubun Dövlət Departamentində yazılmasına dair rəsmi Bakının iddialarını təkzib edib.
Oktyabrın 11-də Bakıda keçirdiyi brifinqdə "Turan"ın xahişi ilə bu ittihamları şərh edərkən o deyib ki, ABŞ demokratiyasının gücü hakimiyyətlərin bölünməsindədir.
"Bizdə bərabər hakimiyyət qolları var. ABŞ-də prezident və icra hakimiyyəti Konqresə nəzarət etmir. Bu demokratiyamızın güclü olmasının səbəbidir. Konqresmenlər düşündüklərini deyirlər. Bizim fikirlərimiz isə hamıya məlumdur. Konqresdəki insanların hərəkətlərinə nəzarət etməyimiz haqda iddialar əsassızsır, bizim sistemə ziddir. Onların müstəqil statusu var", - Podesta vurğulayıb.
Oktyabrın 10-u və 11-də Bakıda BMT-nin İqlim Konfransına hazırıq məqsədi ilə Pre-COP29 tədbiri keçirilib. COP29 bu il noyabrın 11-dən 22-dək Bakıda təşkil ediləcək. C.Podesta Pre-COP29 tədbirlərinə qatılıb.
4 oktyabr
Prezident Əliyev ABŞ konqresmenlərinin Blinkenə çağırışı barədə: 'İradəmizə təsir edə bilməz'
ABŞ-nin 60-dək konqresmeni oktyabrın 3-də dövlət katibi Antoni Blinkeni gələn ay Bakıda keçiriləcək COP29 iqlim konfransı ərəfəsində insan haqlarının müdafiəsi və bütün siyasi məhbusların azad edilməsi üçün Azərbaycan prezidenti İlham Əliyevə təzyiq göstərməyə çağırıb.
"Reuters" yazır ki, 10-u senator, 48-i Nümayəndələr Palatası üzvü olmaqla qrup Blinkenə Azərbaycana bütün siyasi məhbusların azad edilməsi üçün "hiss olunacaq" tədbirlərin görülməsi və Ermənistana qarşı provokativ bəyanatların verilməsinin dayandırılması üçün təzyiq göstərilməsinə çağırış edib.
"COP29 Azərbaycan" "Reuters"in sorğularına hələ ki cavab verməyib.
Ancaq Azərbaycan prezidenti konqresmenlərin müraciətinə münasibət bildirib. AZƏRTAC-ın xəbərinə görə, prezident İlham Əliyev oktyabrın 4-də Cəbrayıl şəhərində sakinlərlə görüşdə bu barədə danışıb. "Səhər mən o müraciəti vərəqlədim, çirkin bir müraciətdir, bizim iradəmizə təsir edə bilməz", - prezident vurğulayıb.
Prezidentin sözlərinə görə, həmin müraciətə baxdıqda təxmin edib ki, bunun müəllifi də, ünvanı da birdir: "... Məndə bir zərrə qədər şübhə yoxdur ki, bu müraciət Amerika Dövlət Departamentində də yazılır. Yəni, özləri özlərinə məktub yazırlar, bizi hədələmək üçün, bizi ittiham etmək üçün".
Hələlik, bu açıqlamaya ABŞ Dövlət Departamentindən münasibət bildirilməyib.
Sonuncu dəfə A.Blinken ilə İ.Əliyev arasında sentyabrın 16-da telefon söhbəti olub. Tərəflər regional və ikitərəfli əməkdaşlıq, o cümlədən Azərbaycanın beynəlxalq insan hüquqları öhdəliklərinə əməl etməsinin vacibliyini müzakirə ediblər.
Bakı onlarla erməni əsiri azad etmişdi
Ötən il Dubayda keçirilən COP28 iqlim konfransında BMT tədbiri üçün ev sahibliyini qəbul etdiyini bildirən Bakı demişdi ki, iki tərəf arasında əldə olunmuş razılaşmaya əsasən, Ermənistan onun ev sahibliyinə etiraz etmir.
Bakı Yerevanın bu hərəkətinə cavab olaraq onlarla erməni əsiri azad etmişdi.
Bir sıra beynəlxalq təşkilatlar ölkədə insan haqlarının bərbad olmasına görə COP29-a ev sahibliyinin Azərbaycana verilməsini tənqid edirlər.
Azərbaycan rəsmiləri isə bildirirlər ki, ölkədə insan haqları qorunur və azadlıqlar təmin edilir.
Qarabağ separatçı liderlərinin həbs müddəti yenə artırılıb
![Bako Saakyan, Arayik Harutyunyan, Lyova Mnatsakanyan, David Manukyan, David İşxanyan, David Babayan](https://d1fo9srdmi2xgc.cloudfront.net/01000000-0aff-0242-c264-08dc74fd2990_cx0_cy5_cw0_w250_r1_s.jpg)
Qarabağda tanınmayan qurumun keçmiş rəhbərlərinin həbs müddəti artırılıb.
Bununla bağlı bugün, oktyabrın 11-də Azərbaycan Baş Prokurorlugu məlumat yayıb.
Prokurorluq qeyd edir ki, separatçıların “prezidentləri” olmuş Arkadi Gukasyan, Bako Sahakyan, Arayik Harutyunyan, sabiq "xarici işlər naziri" Davit Babayan, eləcə də “parlament sədri” David İşxanyan, generallar David Manukyan və digərləri barəsində həbs müddətinin uzadılması ilə bağlı vəsatətlərinə Binəqədi Rayon Məhkəməsində baxılıb.
“Ümumilikdə 14 nəfər Cinayət Məcəlləsinin müxtəlif maddələri ilə məsuliyyətə cəlb olunub. Məhkəmənin qərarına əsasən, qeyd olunan şəxslərin barəsində seçilmiş həbs qətimkan tədbirinin müddəti uzadılıb.”
Amma həbs müddətinin konkret nə qədər artırıldığı qeyd edilimir. Həmin məqamı isə, hələlik, məhkəmə və başqa rəsmi qurumlardan dəqiqləşdirmək mümkün olmayıb.
Azərbaycan Baş Prokurorluğu bundan əvvəl, bu il mayın 15-də onların həbs müddətinin 5 ay artırıldığını açıqlamışdı. Lakin daha sonra da, iyunun 24-də baş prokuror Kamran Əliyev Xankəndidə "Mühitin gücləndirilməsində maarifləndirmə və hüquq-mühafizə tədbirlərinin rolu" mövzusunda keçirilən elmi-praktik konfransda demişdi ki, onların istintaqı başa çatıb.
İstinataqın sonrdan belə uzadılmasının səbəbini də Baş Prokurorluqdan aydınlaşdırmaq cəhdi nəticə verməyib.
Onlar terrorçuluq, qanunsuz silahlı birləşmələr yaratmaq və başqa ağır cinayətlərdə ittiham edilirlər. Onların ayrılıqda ittihamlara münasibətini öyrənmək mümkün olmayıb.
Lakin Ermənistan hökuməti separatçı liderlərin həbsini pisləyib və onların azad olunması üçün beynəlxalq ictimaiyyətə müraciət edib.
Xatırlatma
1990-cı illərin əvvəllərində Qarabağ münaqişəsi Azərbaycan və Ermənistan arasında toqquşmalara səbəb olub.
Azərbaycanın Qarabağ bölgəsi, ətraf 7 rayonu işğal edilmişdi.2020-ci ildə 44 günlük müharibə nəticəsində Bakı həmin 7 rayona, Qarabağın isə bir hissəsinə nəzarətini bərpa edib.
Üstəlik, Bakı ötən il sentyabrın 19-20-də Qarabağda "lokal antiterror tədbirlər" elan edib. Yerevan bunu "etnik təmizləmə" kimi dəyərləndirib.
Qarabağdakı separatçı qurumun son rəhbəri Samvel Şahramanyan Yeni ilə qədər bu qurumun fəaliyyətini dayandıracağını açıqlamışdı. Lakin həmin şəxs sonradan Ermənistana getdikdən sonra bu qərardan imtina edildiyini açıqladı.
Həmin vaxt da Qarabağdan Ermənistana əhali köçü olmuşdu.
Hər iki ölkə arasında həm Avropa İttifaqı, həm də Rusiyanın vasitəçiliyi ilə ayrı-ayrılıqda danışıqlar aparılsa da, hələlik, sülh sazişi imzalanmayıb.
Azərbaycanda bələdiyyələr yarıdan çox azaldılır
Azərbaycanda bələdiyyələr birləşdirilir, bununla da onların sayı kəskin azaldılır.
Bununla bağlı bu gün, oktyabrın 11-də Milli Məclisin Regional məsələlər komitəsinin iclasında müzakirə aparılıb.
Komitədən verilən məlumata görə, 1400 bələdiyyənin birləşdirilməsi, bununla da ölkə ərazisində bələdiyyələrin ümumi sayının 684-ə endirilməsi nəzərdə tutulub.
Deputatların deməsinə görə, "Azərbaycan Respublikasında bələdiyyələrin birləşməsi yolu ilə yeni bələdiyyələrin yaradılması haqqında" və "Bələdiyyələrin əraziləri və torpaqları haqqında" qanunlara əlavə - Azərbaycan Respublikasında bələdiyyələrin siyahısında dəyişiklik edilməsi barədə qanun layihəsi hazırlanıb.
İclasda vurğulanıb ki, bu ilin sonu keçiriləcək bələdiyyə seçkilərində səsvermə yeni yaradılacaq bələdiyyələr üzrə aparılacaq.
Bu vaxta qədər
Bundan əvvəl də Azərbaycanda bələdiyyələr birləşdirilib.
Azərbaycanda ilk dəfə bələdiyyə seçkiləri 1999-cu ildə keçirilib. Ondan sonra ölkədə 2757 bələdiyyə fəaliyyət göstərirdisə, 2009-cu ildə bir çox bələdiyyələr birləşdirilib və onların sayı 1716-ya endirilib. Daha sonra bələdiyyələrin sayı yenə aşağı salınıb və hazırda 1606-dır.
Ölkə vətəndaşları, xüsusilə də kənd sakinləri zaman-zaman bələdiyyələrin birləşdirilməsindən narazılıqlarını bildiriblər. Onlar deyiblər ki, nəticədə bələdiyyələr əlçatımlı olmurlar. Rəsmilər isə belə tənqidlərə cavab olaraq vurğulayıblar ki, bələdiyyələrin birləşdirilməsi onların gücünün artırılmasına xidmət edir.
Xatırlatma
Azərbaycanda növbəti bələdiyyə seçkiləri bu il gözlənir.
Azərbaycanda bələdiyyə qanunla müəyyən edilmiş ərazi hüdudları daxilində yerli özünüidarəetmə formasıdır. Bələdiyyənin öz mülkiyyəti, yerli büdcəsi və seçkili bələdiyyə orqanları mövcuddur. O, Azərbaycan Konstitusiyası və qanun ilə səlahiyyətlərinə aid edilmiş yerli əhəmiyyətli məsələləri müstəqil surətdə həll etməlidir.
Bəzi ekspertlər deyir ki, Azərbaycanda bələdiyyələrin yetərincə səlahiyyətləri yoxdur. Onlar hesab edirlər ki, bələdiyyələr dövlət orqanları sisteminə daxil edilməlidir.
Qazaxda 18 tələbənin zəhərləndiyindən şübhələnirlər
![Ambulans](https://d1fo9srdmi2xgc.cloudfront.net/13645e81-63ce-4492-9f0f-65ed43e01f73_cx0_cy9_cw0_w250_r1_s.jpg)
Bakı Dövlət Universitetinin Qazax filialının 18 tələbəsinin zəhərləndiyi ehtimal edilir.
Tibbi Ərazi Bölmələrini İdarəetmə Birliyindən (TƏBİB) deyilib ki, oktyabrın 10-u saat 19:00-dan başlayaraq Qazax rayon Mərkəzi Xəstəxanasına ümumilikdə 18 nəfər zəhərlənmə şübhəsi ilə müraciət edib.
"Onların hər birinə zəruri tibbi xidmətlər göstərilib. 16 nəfər ambulator müalicə üçün evə buraxılıb, İki nəfərin müalicəsi təcili tibbi yardım bölməsində davam etdirilir, vəziyyətləri orta ağır olaraq qiymətləndirilir", - qurumdan əlavə edilib.
Azərbaycan Qida Təhlükəsizliyi Agentliyindən isə bildirilib ki, hadisənin səbəbləri ilə bağlı araşdırmalara başlanılıb.
Bakı Dövlət Universitetindən və zərərçəkən tələbələrdən məsələ ilə bağlı münasibət öyrənmək mümkün olmayıb.
Xatırlama
Son vaxtlar Azərbaycanda belə oxşar hadisələr vaxtaşırı baş verməkdədir.
Bu il avqustun 15-də Qəbələ rayonunda xəstəxanaya kütləvi müraciət olmuşdu. Yerli sakinlərin bildirməsinə görə, səhhətləri ağırlaşan insanlar rayonda bir toy məclisində iştirak ediblər. Onda ümumilikdə 50-dən çox şəxsin səhhətinin pisləşdiyi deyilirdi.
Ondan dörd gün əvvəl isə Gəncə şəhərində bir yas mərasimindən sonra yüzdən çox şəxsin səhhətinin ağırlaşdığı açıqlanmışdı. Onların da qidadan zəhərləndiyindən bəhs edilirdi.
‘Toplum TV işi’ üzrə həbs edilənlərin şikayəti təmin edilməyib
![](https://d1fo9srdmi2xgc.cloudfront.net/5EE24380-919F-4F3C-B88D-1BA0760D30F4_cx5_cy0_cw86_w250_r1_s.jpg)
Bugün, oktyabrın 10-da Bakı Apellyasiya Məhkəməsində “Toplum TV işi" üzrə həbs edilən bir çox şəxslərin şikayətlərinə baxılıb.
Bu barədə onların vəkilləri məlumat veriblər.
Həmin şəxslər III Respublika Platformasının spikeri Akif Qurbanov, qurumun üzvü Ruslan İzzətli, Demokratik Təşəbbüslər İnstitutunun üzvləri Ramil Babayev, İlkin Əmrahov, Əli Zeynal və "Toplum" İnternet Televiziyasının redaktoru Müşfiq Cabbarlıdırlar. Onların həbs müddətinin 3 ay uzadılması ilə bağlı Xətai Rayon Məhkəməsi oktyabrın 3-də qərar vermişdi.
Vəkillərin bildirməsinə görə, istintaq orqanın nümayəndəsi məhkəmədən şikayətin təmin edilməməsini xahiş edib. Müdafiə tərəfi isə istintaq hərəkətlərinin aparılmadığını və həbs qətimkan tədbirin uzadılması üçün heç bir əsas olmadığını bildirərək şikayətinin təmin edilməsini istəyib.
Məhkəmə apellyasiya şikayətini təmin etməyib.
İş üzrə həbs olunmuş Demokratik Təşəbbüslər İnstitutunun əməkdaşı Əli Zeynalın məhkəmədə Penitensiar Xidmətin əməkdaşlarının təzyiqinə məruz qaldığı deyilir.
Müdafiə tərəfinin verdiyi məlumata görə, 12:30-da başlayacaq prosesə Əli Zeynal 11:10-dan gətirilib və bütün bu müddət ərzində əlləri qandallı şəkildə, ayaq üstdə saxlanıb.
Müdafiə tərəfinin bu açıqlamasına, hələlik, Penitensiar Xidmətindən münasibət öyrənmək mümkün olmayıb.
A.Qurbanov, R.Babayev, İ.Əmrahov, Ə.Zeynal və M.Cabbar bu il martın 6-da, R.İzzətli isə martın 8-də həbs olunublar.
Onlara qarşı Cinayət Məcəlləsinin 206.3.2 (qaçaqmalçılıq - qabaqcadan əlbir olan bir qrup şəxs tərəfindən törədildikdə) maddəsi ilə ittiham irəli sürülüb və barələrində 4 aylıq həbs-qətimkan tədbiri seçilmişdi.
İyulun əvvəlində də onların həbs müddəti 3 ay uzadılmışdı.
Xatırlatma
Ümumilikdə ötən ilin noyabrından başlayaraq Azərbaycanda qruplar halında 20 civarında jurnalist, ictimai fəal qaçaqmalçılıq ittihamı ilə həbs edilib.
Amma onların hamısı ittihamla razılaşmır, bunu peşə fəaliyyətləri və siyasi sifariş ilə izah edirlər. Sonradan onlardan bəzilərinin ittihamı hətta ağırlaşdırılıb.
Yerli hüquq-müdafiə təşkilatlarının hazırladıqları siyahılara görə, hazırda Azərbaycan həbsxanalarında təqribən 300 siyasi məhbus var.
Rəsmilər isə, bir qayda olaraq, vurğulayırlar ki, ölkədə heç kim sırf peşə fəaliyyəti ilə bağlı, siyasi əsaslar ilə həbs edilmir. Onların deməsinə görə, həmin siyahılarda yer alanlar sırf törətdikləri əmələ görə məsuliyyətə cəlb ediliblər.
Azərbaycan 47 min avrodan çox ödəməlidir
Avropa İnsan Hüquqları Məhkəməsi (AİHM) oktyabrın 10-da Azərbaycanla bağlı bəzi qərarlarını elan edib. Məhkəmə qərarlarına görə, Azərbaycan ümumilikdə 47 min 500 avro təzminat və xərclər ödəməlidir.
Onlardan biri 2018-ci il Gəncə hadisələri zamanı öldürüldüyü bildirilən Anar Bağırovun yaxınlarının şikayəti ilə bağlıdır.
Şikayətdə bildirilir ki, 2018-ci il iyulun 12-də Gəncə iğtişaşlarının törədilməsində şübhəli bilinən A.Bağırov hüquq-mühafizə orqanlarının keçirdiyi əməliyyat zamanı öldürülüb. Hakimiyyətə yaxın media orqanlarında onun silahlı müqavimət göstərdiyinə görə öldürüldüyü vurğulanıb. Məhkəmə bu işdə iddia olunan pozuntuları tanıyıb, Avropa Konvensiyasının 2-ci (yaşamaq hüququ) maddəsinin pozulmasına qərar verib. Hökumət ərizəçiyə (bacısı Aynur Bağırova) mənəvi zərər və xərclər əvəzi 32 min avro ödəməlidir.
"Gəncə işi" barədə
2018-ci il iyulun 3-də Gəncə şəhər İcra Hakimiyyətinin başçısı Elmar Vəliyevə (artıq həmin vəzifədə çalışmır) sui-qəsd olub. Vəliyev və onu mühafizə edən polis əməkdaşına qarşı silahlı sui-qəsd ittihamda terror aktı kimi dəyərləndirilib və bu əməli törətməkdə suçlanan Yunis Səfərov ömürlük azadlıqdan məhrum edilib. Onunla birlikdə mühakimə olunan doqquz nəfərə isə 18-20 il həbs cəzası verilib.
Bu cinayət işi üzrə təqsirləndirilən 12 nəfərdən ikisinin – Ağa Sərxani və Anar Bağırovun saxlanılarkən öldürüldüyü açıqlanıb.
Səfərov məhkəmədə bildirib ki, icra başçısını əhaliyə zülm etdiyinə görə öldürmək qərarına gəlib və bu məsələ təkbaşına onun planı olub. Digər təqsirləndirilən şəxslər günahsız olduqlarını, icra başçısına qarşı sui-qəsd olayına heç bir aidiyyətləri olmadığını bildiriblər.
Keçmiş baş prokuror
AİHM-də qərar verilən işlərdən biri də keçmiş baş prokuror və keçmiş səfir Eldar Həsənovun şikayəti ilə bağlıdır. Şikayət onun vəzifə səlahiyyətlərindən sui-istifadə, dövlət vəsaitini təyinatı üzrə yox, başqa məqsədlə xərcləmə, çirkli pulların yuyulması, mənimsənilməsi kimi ittihamlarla tutulması və məhkəməyə qədər həbs edilməsinə aid olub.
Ərizəçinin şikayəti Konvensiyanın 3-cü (qeyri-insani və ya ləyaqəti alçaldan rəftarın qadağan edilməsi), 5-ci (azadlıq və təhlükəsizlik hüququna qanunsuz müdaxilə) və 18-ci (məhdudiyyətlərdən istifadənin məhdudlaşdırılması) maddələrinə əsaslanırdı.
Məhkəmə bu işdə ərizəçiyə münasibətdə Konvensiyanın 3-cü və 5-ci maddələrinin pozulmasına qərar verib. Qərara əsasən, hökumət ərizəçiyə mənəvi zərər və xərclər əvəzi 9 min 234 avro ödəməlidir.
1995-2000-ci illərdə Azərbaycanın baş prokuroru, daha sonra isə müxtəlif ölkələrdə səfir olan Həsənov 2020-ci il avqustun 13-də saxlanıb. O, 2022-ci ildə 10 il həbs cəzası alıb.
Həsənov özünü təqsirli bilmir, ittihamların əsassız olduğunu deyir. Sabiq səfir iddia edir ki, hakimiyyətdə təmsil olunan müəyyən fiqurlar siyasi iddiada olması barədə ölkə başçısına yalan məlumat veriblər.
Hələlik, bu qərarlara Azərbaycanın rəsmi qurumlarından münasibət almaq mümkün olmayıb.
Bakıda COP29-un Yol Xəritəsi nəzərdən keçirilib
![Pre-COP29 müzakirələri](https://d1fo9srdmi2xgc.cloudfront.net/cd407df2-3bdf-4dc6-af41-9b94e8129109_cx0_cy11_cw0_w250_r1_s.jpg)
Oktyabrın 10-da Bakıda BMT-nin İqlim Konfransına hazırıq məqsədi ilə Pre-COP29 tədbiri işə başlayıb.
COP28, COP29 və COP30 sədrliklərinin birgə təşkilatçılığı ilə "Troyka ölkələri"nin "1.5 dərəcə Selsi missiyası üçün Yol xəritəsi" mövzusu müzakirə edilib.
AZƏRTAC-ın xəbərinə görə, Azərbaycanın ekologiya və təbii sərvətlər naziri Muxtar Babayev deyib ki, COP29 çərçivəsində İnsan İnkişafı Günü keçiriləcək: "Belə ki, bütün tərəfləri cəlb etməklə insan inkişafı, irriqasiya və gənclərlə bağlı tədbir olacaq...".
BMT-nin İqlim Dəyişmələri üzrə Çərçivə Konvensiyasının icraçı katibi Saymon Stil isə vurğulayıb ki, hər hansı bir işdə nəticə əldə etmək yalnız əməkdaşlıq çərçivəsində mümkündür: "Biz COP29 çərçivəsində iqlim problemlərinin təsir etdiyi bütün sahələrdə yeni həll yolları tapmaq istəyirik...Düşünürəm ki, Azərbaycanda keçirilən COP29 bu xəritəyə işıq tutacaq".
Avropa İttifaqının iqlim fəaliyyəti üzrə komissarı Vopke Hukstranın sözlərinə görə isə, geosiyasi problemlər çox mürəkkəb məsələdir, ancaq bu, bəhanə ola bilməz: "Dubayda əldə olunan nailiyyətlər genişləndirilməlidir. Bizim 2050-ci ilədək xalis sıfır karbon emissiyasına nail olmaq məqsədimiz var... Biz hədəflərimizin 90 faizini 2040-cı ilə qədər yekunlaşdırmaq istəyirik".
Bu il noyabrın 11-dən 22-dək Bakıda COP29 keçiriləcək.
Ötən il Birləşmiş Ərəb Əmirliklərində (Dubayda) keçirilən COP28 sammitində ölkələr mədən yanacağından uzaqlaşmağa razılaşıblar. Azərbaycan hökuməti isə, öz növbəsində, atmosferə istixana qazlarının buraxılmasını 2030-cu ilədək 35 faiz azaldaraq 1990-cı illər səviyyəsinə salmaq öhdəliyi götürüb.
Xatırlatma
Bir sıra beynəlxalq təşkilatlar COP29 ərəfəsində Azərbaycanda insan hüquqları məsələsini də önə çəkirlər. "Human Rights Watch" və "Freedom Now" kimi insan haqları təşkilatları oktyabrın 8-də açıqladıqları birgə hesabatda bildiriblər ki, Azərbaycanda hökumətin tənqidçilərinə, müstəqil qruplara və mediaya qarşı "kinli" hücum aparılır.
Azərbaycan hakimiyyəti ölkədə insan haqlarının durumunun pisləşməsi ilə bağlı tənqidlərlə razılaşmır, beynəlxalq qurumları qərəzli davranmaqda, provokasiyada ittiham edir.
Yerli hüquq müdafiəçilərinə görə, hazırda ölkə həbsxanalarında 300-dən çox siyasi məhbus var. Rəsmilər isə deyir ki, onlar sırf törətdikləri əmələ görə məsuliyyətə cəlb ediliblər.
Əhməd Əhmədov cəzadan azad edilib, məcburi müalicə olunacaq
![Əhməd Əhmədov](https://d1fo9srdmi2xgc.cloudfront.net/dac51909-bd89-4784-aadb-ec3d34e127d2_cx5_cy0_cw91_w250_r1_s.jpg)
Ailəsinin beş üzvünü - anası, atası, azyaşlı qardaşı, bacısı və onun 3 yaşlı qızını öldürməkdə suçlanan Əhməd Əhmədov cəzadan azad edilib, onun məcburi psixiatriya xəstəxanasına yerləşdirilməsinə qərar verilib. Bu barədə oktyabrın 10-da Bakı Ağır Cinayətlər Məhkəməsində qərar çıxarılıb.
Məhkəmə Ə.Əhmədov haqqında çıxarılmış psixiatrik ekspertiza rəylərinə əsaslanıb. Mart və aprel aylarında keçirilmiş hər iki ekspertiza 25 yaşlı Ə.Əhmədovun "şizofreniya paranoid forma, hallüsinator-paranoid sindromla təzahür edən kəskin psixotrik hal" diaqnozlu psixi xəstəlikdən əziyyət çəkməsi haqda rəy verib.
Həm istintaq, həm də məhkəmə belə nəticəyə gəlib ki, hadisə törədiləndə Ə.Əhmədov anlaqsız durumda olub. Onun xəstəliyi hazırda da davam etdiyinə görə özü və ətrafı üçün təhlükəli sayılır. Bu üzdən məhkəmə cəzadan azad edilərək, ixtisaslaşdırılmış müalicə müəssisəsinə məcburi yerləşdirilməsi barədə qərar çıxarıb.
Prokuror da hakimlərə belə bir qərarın çıxarılmasını təklif edib. Cinayət nəticəsində həyatını itirən zərərçəkmişlərin hüquqi varisləri də buna etiraz etməyib. Yalnız Ə.Əhmədovun bacısının qaynı Rüstəm Niftəliyev məhkəmədə ifadə verərkən şikayətçi olduğunu deyib. O bildirib ki, qardaşının həyat yoldaşı və 3 yaşlı qızının qətlinə görə Ə.Əhmədova ömürlük həbs cəzası verilməsini tələb edir.
Məhkəmədə sənəd elan edilərkən məlum olub ki, Ə.Əhmədov haqqında 2016-cı ildə də Cinayət Məcəlləsinin 127-ci (qəsdən sağlamlığa az ağır zərər vurma) maddəsi ilə cinayət işi başlanıb. Lakin bir müddət sonra o işə xitam verilib.
Ə.Əhmədovun istintaqa ifadəsində iddia olunur ki, ailə üzvlərinin münasibəti onu qane etməyib.
Hadisə fevralın 13-də axşam saat 16.30 radələrində baş verib
Ə. Əhmədovun anası 47 yaşlı Bikə Əhmədova Bakıdakı 59 saylı məktəbin direktoru idi.
Ə.Əhmədov kiçik yaşlarından psixi xəstəlikdən əziyyət çəkir. O, orta məktəbdə 9 il təhsil alıb. Lakin onun Moskva universitetinin məzunu olması barədə diplomu var.
Anası Sevinc Vaqifqızına yaxınları ilə görüşünə icazə verilmədiyini deyir
![Sevinc Vaqifqızı](https://d1fo9srdmi2xgc.cloudfront.net/01000000-c0a8-0242-56fd-08dbf4c2725f_cx29_cy1_cw41_w250_r1_s.jpg)
“Abzas Media” nəşrinin həbsdəki baş redaktoru Sevinc Vaqifqızının anası Ofeliya Məhərrəmova AzadlıqRadiosuna bildirib ki, sentyabrın əvvəlindən qızı ilə görüşə bilmir.
Onun vurğulamasına görə, sentyabrın 1-də Azərbaycanda keçirilən parlament seçkilərindən sonra S. Vaqifqızı ictimaiyyətə açıqladığı bir məlumata görə cəzalandırılır:
"Seçkilərdən sonra bizi Sevinclə görüşdürmürlər. 1 saylı Bakı İstintaq Təcridxanasının rəhbərliyi mənə dedi ki, Sevinc təcridxanada əcnəbilərin də seçkilərdə səsverməyə cəlb edildiyini iddia etdiyinə görə cəzalandırılır".
O.Məhərrəmova deyir ki, qızı ilə görüşlərinə icazə verilməməsi qanunsuzdur.
Onun dediklərinə, hələlik, Penitensiar Xidmətindən münasibət öyrənmək mümkün olmayıb.
Azərbaycanda sentyabrın 1-də keçirilən parlament seçkilərində 125 mandat uğrunda 990 namizəd mübarizə aparırdı.
Yerlərin yarıdan çoxunu yenə hakim Yeni Azərbaycan Partiyası (YAP) qazandı. ATƏT-in Demokratik Təsisatlar və İnsan Haqları Bürosunun sentyabrın 2-də açıqlanan ilkin hesabatında vurğulanırdı ki, mövcud şərtlər seçkilərin demokratik standartlara uyğun keçirilməsinə imkan verməyib.
Mərkəzi Seçki Komissiyası isə hesab edir ki, həmin seçkilər çox yüksək səviyyədə keçirilib.
Xatırlatma
“Abzas Media” işi ilə bağlı əvvəlcə ötən il noyabrın 21-də həmin nəşrin dierktoru Ülvi Həsənli, Sevinc Vaqifqızı daha sonra isə daha bir neçə şəxs həbs ediliblər.
Onlara əvvəlcə qaçaqmalçılıq ittihamı verilib, sonra ittiham ağırlaşdırılıb. Həmin şəxslər ittihamları qəbul etmir və həbslərini peşə fəaliyyəti ilə əlaqələndirirlər.
Ümumilkdə ötən ilin noyabrından başlayaraq Azərbaycanda qruplar halında 20 civarında jurnalist, ictimai fəal qaçaqmalçılıq ittihamı ilə həbs edilib. Onların hər biri ittihamla razılaşmır, bunu peşə fəaliyyətləri və siyasi sifariş ilə izah edirlər.
Yerli hüquq-müdafiə təşkilatlarının hazırladıqları siyahılara görə, hazırda Azərbaycan həbsxanalarında təqribən 300 siyasi məhbus var.
Rəsmilər isə, bir qayda olaraq, vurğulayırlar ki, ölkədə heç kim sırf peşə fəaliyyəti ilə bağlı, siyasi əsaslar ilə həbs edilmir.
Əfqan Sadıqov həbsxanada müalicə müəssisəsinə köçürülüb
![Əfqan Sadıqov](https://d1fo9srdmi2xgc.cloudfront.net/09470000-0a00-0242-ee4b-08da489573fc_w250_r1_s.jpg)
Gürcüstanda həbsdə olan azərbaycanlı bloqer Əfqan Sadıqovun səhhəti pisləşib. Bu barədə "Sosial ədalət mərkəzi"nin başçısı Tamta Mikeladze məlumat verib.
AzadlıqRadiosunun gürcü xidməti yazır ki, Ə.Sadıqov Tbilisinin Qldani rayonundakı təcridxanada tibb müəssisəsinə köçürülüb.
Sentyabrın 21-də təcridxanada aclıq aksiyası elan edən bloqer Gürcüstandan Azərbaycana ekstradisiya olunmamasını tələb edir.
T.Mikeladze yazır ki, Ə.Sadıqovun səhhəti qəflətən pisləşib, onun həyat yoldaşına bu barədə bilgi verilib.
Gürcüstanın Miqrasiya Xidməti Ə.Sadıqova siyasi sığınacaq verməkdən imtina edib. O, avqustda Azərbaycanın sorğusu əsasında saxlanılıb və Bakıya deportasiya edilə bilər. Ona qarşı cinayət işi qaldırıldığı bildirilir.
"Amnesty International" beynəlxalq insan haqları təşkilatı Gürcüstan hakimiyyətini Ə.Sadıqovun Azərbaycana deportasiyasını dayandırmağa çağırıb.
AzelTV-nin rəhbəri olan Ə.Sadıqov 2020-ci ildə xeyli miqdarda əmlakı hədə-qorxu ilə tələb etmədə təqsirli bilinərək 7 il həbs olunub. Bir il sonra onun cəzası 6 ilə endirilib və o, 2022-ci il mayın 27-də əfv olunub.
Bloqer daha öncə də məhbus həyatı yaşayıb, bütün hallarda ittihamları qəbul etməyib və onların onun jurnalist fəaliyyətinin məhdudlaşdırılmasına yönəldiyini bildirib.
Onu yerli hüquq müdafiəçiləri əvvəlki həbsi zamanı siyasi məhbus kimi tanımışdılar. Amma rəsmilər ölkədə siyasi məhbusların olması ilə bağlı fikirləri qəbul etmirlər. Onlar deyirlər ki, Azərbaycan siyasi məhbus adlandırılan şəxslər sırf törətdikləri əmələ görə məsuliyyətə alınıblar.
Hazırda Azərbaycanda azı 10 jurnalist həbsdədir, onlar ittihamları qəbul etmir, siyasi motivli sayırlar.
Bakıda partlayış olub, 8 nəfər xəsarət alıb
![](https://d1fo9srdmi2xgc.cloudfront.net/02a30000-0aff-0242-6d63-08da29311b3f_cx0_cy10_cw0_w250_r1_s.jpg)
Oktyabrın 7-də günorta saatlarında Azərbaycan paytaxtı Bakı şəhəri, Nizami rayonundakı 8-ci Köndələn küçəsində qazanxanada partlayış baş verib.
Fövqəladə Hallar Nazirliyi (FHN) bildirir ki, hadisə nəticəsində xəsarət alan 6 nəfər müvafiq tibb müəssisələrinə yerləşdirilib:
“... Ümumi sahəsi 40kv.m. olan qazanxanada ilkin ehtimala görə qaz sızması nəticəsində yanğınla müşayiət olunmayan partlayışın baş verdiyi müəyyən edilib. Partlayış nəticəsində qazanxana binası və ərazidə sahəsi 240kv.m. olan tikilinin konstruksiyaları dağılıb, yaxınlıqdakı dördmərtəbəli binanın pəncərə şüşələri qırılıb, 3 avtomobilə ziyan dəyib.”
Tibbi Ərazi Bölmələrini İdarəetmə Birliyindən (TƏBİB) verilən məlumata görə, xəsarət alanlardan 1 nəfərin vəziyyəti kritik ağır, 1 nəfərin vəziyyəti ağır, 2 nəfərin vəziyyəti orta ağır, 2 nəfərin vəziyyəti isə qənaətbəxş qiymətləndirilir:
“Təcili tibbi yardım briqadaları tərəfindən 2 nəfərə nevrotik reaksiya diaqnozu ilə yerində yardım göstərilib.”
Hələlik, məsələ ilə bağlı zərəçəkənlərin yaxınları və qazanxanaya cavabdeh şəxslərlə danışmaq mümkün olmayıb.
'ToplumTV işi' üzrə tutulanların həbs müddəti uzadıldı
Ələsgər Məmmədlinin məhkəmədə pis rəftarla üzləşdiyi deyilir
“Toplum” İnetrnet Televiziyasının təsisçisi Ələsgər Məmmədlinin bugün, oktyabrın 3-də Xətai Rayon Məhkəməsində pis rəftara məruz qaldığı bildirilir.
Bu barədə onun qardaşı Nəsimi Məmmədli məlumat verib.
Nəsimi Məmmədlinin sözlərinə görə, istintaq təcridxanasına qaytarıldıqdan sonra Ələsgər Məmmədli ona zəng edib və deyib ki, proses başlayana qədər onu qolları qandallı halda məhkəmə binasında bir otaqda saatlarla gözlədiblər:
“Bu səbəbdən onun arterial təzyiqi yüksəlib və gözlərindəki kiçik damarların partlaması nəticəsində subkonyunktival qansızma baş verib. Gözün ağ hissəsi qanla örtülüb, görməsində müəyyən problem yaranıb. Məhkəmənin hakimi pis rəftara görə "konvoylara" şifahi irad bildirsə də hər hansı qərar qəbul etməyib.”
Onun deməsinə görə, qardaşının tibbi müayinəsi üçün məhkəməyə əlavə müraciət olunmalıdır.
Hələlik, bu açıqlamaya Ədliyyə Nazirliyi və Xətai Rayon Məhkəməsindən münasibət alma qmümkün olmayıb.
***
"ToplumTV işi" üzrə tutulan şəxslərin həbs-qətimkan tədbirlərinin müddəti daha 3 ay uzadılıb.
Bu gün, oktyabrın 3-də Xətai rayon Məhkəməsində istintaq orqanının həbs-qətimkan tədbirlərinin 3 ay uzadılması ilə bağlı vəsatətlərinə baxılıb. Məhkəmə vəsatətləri təmin edib.
III Respublika Platformasının spikeri Akif Qurbanovun, həmin qurumun üzvü Ruslan İzzətlinin, Demokratik Təşəbbüslər İnstitutunun üzvləri Ramil Babayev, İlkin Əmrahov, Əli Zeynalın, habelə "Toplum" İnternet Televiziyasının təsisçi Ələsgər Məmmədli və redaktoru Müşfiq Cabbarın həbs müddəti 3 ay uzadılıb.
Müdafiə tərəfi məhkəmə qərarını əsassız hesab edir və qərardan apellyasiya şikayəti verəcək.
A.Qurbanov, R.Babayev, İ.Əmrahov, Ə.Zeynal və M.Cabbar bu il martın 6-da, R.İzzətli və Ə.Məmmədli isə martın 8-də həbs olunublar. Onlara qarşı Cinayət Məcəlləsinin 206.3.2 (qaçaqmalçılıq - qabaqcadan əlbir olan bir qrup şəxs tərəfindən törədildikdə) maddəsi ilə ittiham irəli sürülüb və onlar barəsində 4 aylıq həbs-qətimkan tədbiri seçilmişdi.
İyulun əvvəlində barələrində həbs-qətimkan tədbirin müddəti 3 ay uzadılıb. Bu müddət bir neçə gün sonra başa çatırdı.
Xatırlatma
Ümumilikdə ötən ilin noyabrından başlayaraq Azərbaycanda qruplar halında 20 civarında jurnalist, ictimai fəal qaçaqmalçılıq ittihamı ilə həbs edilib. Amma onların hamısı ittihamla razılaşmır, bunu peşə fəaliyyətləri və siyasi sifariş ilə izah edirlər. Sonradan onlardan bəzilərinin ittihamı hətta ağırlaşdırılıb.
Yerli hüquq-müdafiə təşkilatlarının hazırladıqları siyahılara görə, hazırda Azərbaycan həbsxanalarında təqribən 300 siyasi məhbus var. Rəsmilər isə, bir qayda olaraq, vurğulayırlar ki, ölkədə heç kim sırf peşə fəaliyyəti ilə bağlı, siyasi əsaslar ilə həbs edilmir. Onların deməsinə görə, həmin siyahılarda yer alanlar sırf törətdikləri əmələ görə məsuliyyətə cəlb ediliblər.
Azərbaycanın Niderlanddakı səfiri Rusiyada səfiri olacaq
![Rəhman Mustafayev](https://d1fo9srdmi2xgc.cloudfront.net/c6c49be2-58f8-45a3-ae0b-2563ffb8d56b_cx0_cy4_cw0_w250_r1_s.jpg)
Prezident İlham Əliyev Azərbaycanın Rusiyaya yeni səfirini təyin edib.
Prezidentin oktyabrın 1-də imzaladığı sərəncamı ilə Rəhman Mustafayev Azərbaycan Respublikasının Rusiya Federasiyasında fövqəladə və səlahiyyətli səfiri təyin edilib.
Prezidentin imzaladığı digər sərəncama əsasən, R.Mustafayev Azərbaycanın Niderlanddakı səfiri vəzifəsindən geri çağırılıb.
Bundan əvvəl Azərbaycanın Rusiyadakı səfiri Polad Bülbüloğlu olub. O, 2006-cı ildən həmin vəzifəni tuturdu.
P.Bülbüloğlu 2024-cü ilin sentyabrın 1-də keçirilən növbədənkənar parlament seçkilərində deputat mandatı qazandıqdan sonra səfir vəzifəsindən geri çağırılıb.
Qısa tanışlıq
1963-cü ildə Bakıda doğulan R.Mustafayev Moskva Dövlət Universitetinin Beynəlxalq iqtisadi münasibətlər fakültəsində təhsil alıb.
1993-cü ildən Azərbaycan Respublikası Prezidentinin İcra Aparatında İnformasiya-analiz xidmətinin baş məsləhətçisi işləyib. 1994-1997-cı illərdə Azərbaycanın Rusiyadakı səfirliyinin əvvəlcə üçüncü, sonra ikinci, ardınca birinci katibi olub. 1997-1999-cu illərdə Dövlət Əmlak Komitəsinin Xarici əlaqələr şöbəsinin müdiri olub.
O, 2000-2006-cı illərdə Azərbaycanın Rusiyadakı səfirliyində müşavir işləyib.
2006-cı ildən 2009-cu ilədək Xarici İşlər Nazirliyinin birinci ərazi idarəsinin direktoru olan R.Mustafayev daha sonra Azərbaycanın Yunanıstanda, eyni zamanda Albaniyada, daha sonra isə Fransada fövqəladə və səlahiyyətli səfiri olub.
61 yaşlı R.Mustafayev 2022-ci ilin oktyabrından Azərbaycanın Niderlanddakı səfiri idi.
Vidadi İsgəndərli vəfat edib
Bu gün, oktyabrın 1-i siyasi mühacir Vidadi İsgəndərli Fransanın Müluz şəhərində xəstəxanada vəfat edib. Bu barədə onun qardaşı Oktay İsgəndərli məlumat verib.
Onun sözlərinə görə, V.İsgəndərli səhər saatlarında vəfat edib: "Ailə səhər saat 5-də Vidadi İsgəndərli ilə vidalaşmaq üçün hospitala dəvət olunmuşdu. Ailə üzvləri bir neçə saat onunla birgə qaldı. Vidadi saat 10 radələrində vəfat etdi".
O.İsgəndərli bildirib ki, meyit bir neçə gün ekspertiza üçün hospitalda saxlanacaq və ekspertizanın rəyi hazır olduqdan sonra nəşi ailə üzvlərinə təhvil veriləcək: "Bu, təkcə bizim ailənin faciəsi deyil, Vətəni, xalqını sevən hər bir insan üçün acı faciədir".
Onun vurğulamasına görə, V. İsgəndərli Azərbaycan xalqının azadlığı uğrunda həlak olub.
Qardaşı deyir ki, Vidadi İsgəndərli 24 bıçaq yarası alıb
Sentyabrın 29-da Fransanın Müluz şəhərində yaşayan mühacir Vidadi İsgəndərliyə silahlı hücum olduğu bildirilir. Hazırda onun vəziyyətinin ağır olduğu vurğulanır.
Bu barədə onun qardaşı Oqtay İsgəndərli V.İsgəndərlinin müalicə aldığı klinikanın baş həkimi ilə görüşündən sonra bildirib.
"Fransada mühacir həyatı yaşayan qardaşım Vidadi İsgəndərli sentyabrın 29-da Paris vaxtı ilə saat 7.30-da naməlum şəxslərin hücumuna məruz qalıb. Yaşadığı evin pəncərəsindən üç nəfər killer Vidadinin yataq otağına daxil olaraq ona çoxsaylı bıçaq zərbəsi endirib".
Qardaşının sözlərinə görə, hadisə baş verən gün məsələ ilə bağlı tam təfsilatlı məlumat əldə edə bilməyib: "30 saniyə Vidadi ilə söhbət etdim. Dedi ki, üç nəfər maskalı şəxs idi, onlar danışmırdılar. Onu bıçaqla vurublar. Vidadi müqavimət göstərib və qaçıblar. Sentyabrın 30-da hospitalın baş həkimi ilə görüşdüm. Baş həkim bildirdi ki, səhərə yaxın vəziyyəti lap ağırlaşıb. Çox çətinliklə onu yenidən həyata qaytarıblar. Baş həkim əlavə etdi ki, qarın nahiyəsinə 21 bıçaq zərbəsi vurulub, bir bıçaq zərbəsi qara ciyərinə, ondan güclü bir bıçaq zərbəsi ağciyərinə dəyib. Nəfəsalma prosesi çətinləşib".
Qardaşının bildirməsinə görə, baş həkim deyib ki, daha bir bıçaq zərbəsi isə arxadan baş nahiyəsinə vurulub: "Onu nəzarətdə saxlayırlar. Çox ağır bir xəbər idi. Həkim dedi ki, ailəsini və uşaqlarını gətirin... Mənim də telefon nömrəmi aldılar. Soruşdum ki, onun yaşamaq şansı varmı? Həkimdən cavab almadım. Dedi ki, onlar əllərindən gələni edirlər...".
Yaxınları Vidadi İsgəndərli ilə bağlı son baş verənləri onun siyasi fəaliyyəti ilə izah edirlər.
Amma bütün bu deyilənlərə, hələlik, nə Fransa və nə də Azərbaycan hüquq-mühafizə orqanlarından münasibət almaq mümkün olub.
Xatırlatma
V.İsgəndərli Azərbaycanda 2010-cu ildə keçirilən parlament seçkilərində iştirak edib. Seçkiləri saxtalaşdırıldığını açıqlayıb. Müxalifət təmsilçiləri ilə etiraz aksiyalarına qatılıb. 2011-ci ildə o, Bakıda saxlanıb. Məhkəmə onu döymə, seçki hüquqlarının həyata keçirilməsinə mane olma və seçki komissiyalarının fəaliyyətinə müdaxilə ittihamı üzrə təqsirli bilərək 3 il yarım azadlıqdan məhrum edib.
V.İsgəndərli ittihamları qurma sayıb. O, 2012-ci ilin dekabrında Azərbaycan prezidentinin imzaladığı əfv sərəncamı ilə azadlığa buraxılıb.
İsgəndərli 2015-ci ildə Fransaya mühacirət edib. O, mühacirətdə sərt çıxışları ilə diqqət çəkib.
Bundan öncə də Azərbaycandan Avropaya gedib siyasi sığıncaq əldə edən bəzi şəxslərə də hücum edildiyi ilə bağlı məlumatlar yayılıb. Onların bəziləri bu hücumu siyasi fəaliyyətləri ilə əlaqələndiriblər. Elə 2021-ci ildə Fransanın Nant şəhərində siyasi mühacir, bloqer Məhəmməd Mirzəliyə də bıçaqla hücum olmuşdu. 2022-ci ildə Fransa məhkəməsi üçü əslən Azərbaycandan olmaqla dörd nəfəri adam öldürməyə cəhd ittihamı ilə həbs edib.
Strasburqda İqbal Əbilovu müdafiə aksiyası keçirilib
![İqbal Əbilova dəstək piketi](https://d1fo9srdmi2xgc.cloudfront.net/083ad3a9-e6c2-477c-9b2c-c75f63288a80_w250_r1_s.jpeg)
Bu gün, sentyabrın 30-da Strasburqda Avropa Şurasının qarşısında Azərbaycanda milli ədavətin qızışdırılması və dövlətə xəyanət ittihamı ilə həbs edilən 'Talış Milli Akademiyasının xəbərləri'nin baş redaktoru İqbal Əbilovun müdafiəsi üçün etiraz aksiyası keçirilib.
Aksiyanı Avropa Şurası Parlament Assambleyasının (AŞPA) payız sessiyasının açılışı ilə əlaqədar İ.Əbilovun dostları və fəallar təşkil edib.
"İqbal Əbilov sosial elmlərlə məşğul olub. Belarusda talış diasporunun fəal üzvü olub. Azərbaycanda etnik azlıq olan talışların mədəniyyətini araşdırıb", - aksiyanın iştirakçılarından biri Yelena Karol bildirib.
"Azərbaycanda onun elmi fəaliyyətində dövlətin bütövlüyünə təhlükə aşkar edilib və o, dövlətə xəyanətdə ittiham olunub. Ancaq elmi araşdırmaların siyasətlə heç bir əlaqəsi yoxdur və bizim səylərimiz bu işə diqqəti cəlb etmək məqsədi daşıyır", - o deyib.
Onun sözlərinə görə, Əbilov təkcə talışların yox, bütövlükdə Azərbaycan mədəniyyətinin araşdırılmasına öz töhfəsini verib.
"Odur ki, biz Azərbaycan hakimiyyətini İqbalı azad etməyə çağırırıq", - oəlavə edib.
Hələlik, aksiyaya Azərbaycan rəsmilərindən münasibət almaq mümkün olmayıb.
Xatırlatma
İqbal Əbilov bu il iyulun 22-də Azərbaycana qohumlarının yanına gələrkən saxlanıb. Ona qarşı Azərbaycan Cinayət Məcəlləsinin 274 (dövlətə xəyanət), 281.3 (xarici təşkilatların və ya onların nümayəndələrinin tapşırığı ilə dövlətə qarşı yönəlmiş ictimai çağırışlar) və 283.1-ci (milli, irqi, sosial və ya dini nifrət və düşmənçiliyin qızışdırılması) maddələrilə ittiham irəli sürülüb.
Əbilov ittihamları rədd edir və yalnız elmi fəaliyyətlə məşğul olduğunu bildirir.
35 yaşlı İ.Əbilov virtual "Talış Milli Akademiyası"nın mətbu orqanı olan "Talış Milli Akademiyasının xəbərləri"nin baş redaktorudur. Saytda talış folklor nümunələri, talışlarla bağlı nəşr olunmamış tarixi sənədlər, tədqiqatlar dərc edilib.
İ.Əbilov Belarus Dövlət Universitetinin beynəlxalq münasibətlər ixtisası üzrə 2012-ci ildə bakalavr, 2013-cü ildə isə magistraturasını bitirib. 2016-cı ildə həmin universitetin aspiranturasına daxil olub.
Hərbi Xidmətə Çağırış üzrə Dövlət Xidmətində bölmə rəisi həbs edilib
![İllüstrativ foto](https://d1fo9srdmi2xgc.cloudfront.net/01000000-0aff-0242-2532-08dba4b4908b_w250_r1_s.jpg)
Səfərbərlik və Hərbi Xidmətə Çağırış üzrə Dövlət Xidmətinin Daşkəsən rayon bölməsinin rəisi vəzifəsini icra edən, mayor Anar Əsgərov həbs edilib.
AZƏRTAC Hərbi Prokurorluğun mətbuat xidmətinə istinadən xəbər verib ki, onun barəsində Cinayət Məcəlləsinin 311.3.2-ci (təkrar rüşvət alma) maddəsi ilə ittiham elan edilib, Bakı Hərbi Məhkəməsinin qərarı ilə barəsində dörd aylıq həbs qətimkan tədbiri seçilib.
Amma, hələlik, ittihama Anar Əsgərov və ya vəkilindən münasibət almaq mümkün olmayıb.
Həmin maddə üzrə şəxsə 12 ilə qədər həbs cəzası verilə bilər.
Mətbuat xidmətindən habelə bildirilib ki, Hərbi Prokurorluğun İstintaq idarəsində cinayət işi üzrə müvafiq əməlləri törətməsinə şübhələr olan həmin Xidmətin Şuşa şəhər şöbəsinin sabiq rəisi, polkovnik Seymur Qurbanov barəsində də 4 aylıq həbs qəti imkan tədbiri seçilib. O, isə Cinayət Məcəlləsinin 178.2.2-ci (təkrar törədilməklə dələduzluq), 311.3.2-ci və digər maddələr ilə ittiham olunur.
Amma bu ittihamlara da, hələlik, Seymur Qurbanov və yaxınlarının münasibəti bəlli deyil.
Xatırlatma
Ötən il Xidmətin Xəzər, Xaçmaz, Cəlilabad və Laçın rayon şöbələrinin vəzifəli şəxsləri də oxşar ittihamlarla üzləşmişdilər. Onlar isə əsasən ittihamları qəbul etmirdilər.
Azərbaycanda hər il dörd dəfə - yanvar, aprel, iyul və oktyabrda müddətli həqiqi hərbi xidmətə çağırış gerçəkləşdirilir və minlərlə gənc hərbi xidmətə cəlb olunur.
Pakistan Azərbaycana JF-17 qırıcıları satmaq üçün kontrakt imzalayıb
![JF-17](https://d1fo9srdmi2xgc.cloudfront.net/e8093ec5-17c6-42b4-a14f-f8da98ad4050_w250_r1_s.jpg)
Pakistan ordusunun sentyabrın 26-da bildirdiyinə görə, Azərbaycana "JF-17 Block III" qırıcı təyyarələrinin satışı üzrə kontrakt imzalanıb.
Təyyarəni Pakistan Aeronavtika Kompleksi ilə Çin birlikdə hazırlayır. Son illər İslamabadla Pekinin hərbi münasibətləri sıxlaşıb, Birləşmiş Ştatlar ilə zəifləyib.
Azərbaycana neçə qırıcının, hansı qiymətə satılacağı açıqlanmayıb. Bəyanatda deyilir ki, İslamabad dost ölkələrlə müdafiə sahəsində əməkdaşlığı gücləndirməyə, Azərbaycanın hava gücünü artırmağa çalışır.
Həm də Türkiyənin müttəfiqi olan Pakistan Azərbaycanı 2020-ci il Qarabağ müharibəsində dəstəkləyib. Azərbaycan həmin 44 günlük müharibə və 2023-cü ildə birgünlük hərbi əməliyyatla ərazi bütövlüyünü bərpa edib. Ermənistanla sülh sazişi imzalanmayıb, sərhədlər delimitasiya olunmayıb.
Azərbaycan prezidenti İlham Əliyev iyulda Pakistana səfər edib. Tərəflər müdafiə də daxil olmaqla bir sıra sahələrdə əməkdaşlığı genişləndirmək üzrə razılığa gəliblər.
Pakistan Bakıda keçirilən müdafiə sərgisində iştirak üçün hava qüvvələri kontingenti göndərib, bu təyyarə nümayiş olunub.
ABŞ səfiri Ombudsmanla insan haqlarını müzakirə edib
![Ombudsman ABŞ səfirini qəbul edib](https://d1fo9srdmi2xgc.cloudfront.net/996afd17-68fd-4aef-9ede-aaad72590c64_cx0_cy1_cw0_w250_r1_s.jpg)
Azərbaycanın İnsan Hüquqları üzrə Müvəkkili (Ombudsman) Səbinə Əliyeva sentyabrın 25 də Birləşmiş Ştatların (ABŞ) Azərbaycandakı fövqəladə və səlahiyyətli səfiri Mark Libbini qəbul edib.
Ombudsman Aparatının məlumatına görə, görüş zamanı Ombudsman insan hüquq və azadlıqlarının müdafiəsi sahəsində son dövrdə həyata keçirdiyi fəaliyyət barədə qonağa ətraflı məlumat verib.
ABŞ səfirliyi də X platformasında görüş barədə səfir Libbiyə istinadən məlumat yayıb.
"Ombudsman Səbinə Əliyeva ilə insan haqlarını müzakirə etmək üçün görüşməyimə şadam. Biz Azərbaycanı beynəlxalq öhdəliklərinə əməl etməyə çağırırıq", - M.Libbi qeyd edib.
Xatırlatma
Ötən ilin noyabrından başlayaraq Azərbaycanda qruplar halında 20-dən çox jurnalist, ictimai fəal qaçaqmalçılıq və başqa ittihamlarla həbs edilib. Onların hər biri ittihamla razılaşmır, bunu peşə fəaliyyətləri və siyasi sifariş ilə izah edirlər. Yerli hüquq-müdafiə təşkilatlarının hazırladıqları siyahılara görə, hazırda Azərbaycan həbsxanalarında təqribən 300 siyasi məhbus var. Rəsmilər isə, bir qayda olaraq, vurğulayırlar ki, ölkədə heç kim sırf peşə fəaliyyəti ilə bağlı, siyasi əsaslar ilə həbs edilmir.
Azərbaycanda karantin gələn ilə qədər uzadılıb
Azərbaycanda xüsusi karantin rejiminin müddəti yenə uzadılıb.
Baş nazir Əli Əsədov bununla bağlı qərar imzalayıb.
"Koronavirus (COVID-19) infeksiyasının ölkə ərazisində yayılmasının, onun törədə biləcəyi fəsadların qarşısının alınması məqsədilə Azərbaycan ərazisində xüsusi karantin rejiminin müddəti 2025-ci il 1 yanvar saat 06:00-dək uzadılsın", - qərarda yazılıb.
Bundan əvvəl xüsusi karantin rejimi oktyabrın 1-nə kimi uzadılmışdı.
Azərbaycanda koronavirus pandemiyası ilə bağlı 2020-ci ilin martından karantin rejimidir. Yoluxma sayından asılı olaraq rejim arada sərtləşdirilsə də, sonra yenə yumşaldılıb. Onun müddəti dəfələrlə uzadılıb.
Bu karantin çərçivəsində Azərbaycanın quru sərhədində xarici ölkələrə gediş-gəlişdə hələ də məhdudlaşdırmalar saxlanıb. Bəzi müxalifət partiyalarının rəhbərləri pandemiyanın başa çatmasına baxmayaraq, bəzi məhdudiyyətin saxlanmasını hakimiyyətin siyasi, iqtisadi maraqları ilə izah edir.
Prezident İlham Əliyev isə bu həftə Milli Məclisdə çıxışında bu məsələni təhlükəsizlik amili ilə izah etdi: "Mən tam əminliklə deyə bilərəm ki, son illər ərzində quru sərhədlərimizin bağlı olması bizi çox böyük fəlakətlərdən xilas etdi. Hətta bu gün - sərhədlər bağlı olan vaxtda təhlükəli hərəkətlər aparılır və bu hərəkətlərin qarşısı alınır".
Xatırlatma
2019-cu ilin sonlarında dünyada yeni koronavirus aşkar edilib. 2020-ci il martın 11-də Ümumdünya Səhiyyə Təşkilatı (ÜST) koronavirusu pandemiya elan edib. Dünyada sürətlə yayılan bu virusdan 7 milyon civarında şəxsin vəfat etdiyi bildirilir. Azərbaycanda isə indiyə kimi 830 mindən çox şəxsin bu virusa yoluxduğu, onlardan 10 min 400-nün vəfat etdiyi bildirilir. Amma son illər bu virusa yoluxmanın kəskin şəkildə azaldığı vurğulanır.
ÜST ötən il mayın 5-də koronavirus pandemiyasının başa çatdığını açıqlayıb.
Çeçenistanda saxlanan Azərbaycan vətəndaşları ölkəyə gətirilib
![Rusiyada polis reydlərindən birindən sonra (Arxiv fotosu)](https://d1fo9srdmi2xgc.cloudfront.net/01000000-0a00-0242-e94c-08db893cb92e_cx0_cy9_cw0_w250_r1_s.jpg)
Çeçenistanda saxlanan Azərbaycan vətəndaşları ölkəyə gətirilib.
Bu barədə bu gün, sentyabrın 24-də Azərbaycan Xarici İşlər Nazirliyi (XİN) məlumat yayıb.
Təqribən bir ay bundan əvvəl Rusiyanın Çeçenistan Respublikasında üç nəfər Azərbaycan vətəndaşı - Elxan Şirinov, Vüqar Məhərrəmov və Nihad Rzayevin miqrasiya qanunlarını pozmaları ittihamı ilə saxlandıqları bildirilirdi. Daha sonra E.Şirinov və V.Məhərrəmovun Qroznıda Ukraynada müharibəyə göndərilmək məqsədilə təlimlərə cəlb olunduqları vurğulanırdı.
Azərbaycan XİN-dən vurğulanıb ki, həmin şəxslərin ölkəyə geri qaytarılması məqsədilə Rusiya XİN-nə nota ünvanlanıb və aidiyyəti qurumlar ilə danışıqlar aparılıb: "Bununla yanaşı, saxlanılmış vətəndaşlarımız ilə səfirliyimiz tərəfindən telefon danışığı baş tutub. Vətəndaşlarımızın... 21 sentyabr tarixində Rusiya Federasiyası ilə dövlət sərhəd keçid məntəqəsindən quru yolla Azərbaycana qayıdışı təmin edilib".
Hələlik, məsələ ilə bağlı həmin şəxslər və Rusiya tərəfi ilə danışmaq mümkün olmayıb.
Yeri gəlmişkən, Rusiya prezidenti Vladimir Putin 2024-cü ilin avqustunda Rusiya vətəndaşlığı almış şəxslərin icbari qaydada hərbi qeydiyyata düşməsinə dair qanun imzalayıb.
Bu tələbin yerinə yetirilməməsi Rusiya vətəndaşlığından məhrum edilmə ilə nəticələnə bilər.
Xatırlatma
2022-ci ilin fevralın 24-də Rusiya Ukraynaya təcavüz edib. Bundan sonra Qərb ölkələri Rusiyaya qarşı sanksiyaları genişləndirib. (sanksiyalar 2014-cü ildə Rusiyanın Ukraynanin Krım bölgəsini ilhaq etməsindən sonra başlamışdı) Azərbaycan sanksiyalara qoşulmur. Artıq 2 il yarımdır davam edən müharibədə yüz minlərlə insanın həlak olduğu, milyonlarla insanın qaçqın düşdüyü bildirilir.