Azərbaycanda internet mediasının tənzimlənməsi ilə bağlı ayrıca qanun qəbul edilə bilər.
Bu təşəbbüslə Milli Məclisin bu gün, oktyabrın 1-də keçirilmiş iclasında deputat, Mətbuat Şurasının sədri Əflatun Amaşov çıxış edib. Bu haqda onun özü məlumat verib.
Qanunlara müxtəlif vaxtlarda dəyişikliklər ilə internet üzərindən yayımın məsuliyyət məsələsinin diqqətdə saxlanıldığını deyən deputat bunun yetərli olmadığını ifadə edib.
«İnternet medianın funksiya və vəzifələri ayrıca qanunda əksini tapsa, daha faydalıdır. «Televiziya və radio yayımı haqqında» Qanun varsa, «Kabel şəbəkəsi haqqında» Qanun qəbul etməyi düşünürüksə, demək, internet media fəaliyyətinin də hüquqi əsaslarını bir qanunda birləşdirmək zəruridir», - deyən deputata görə, bu, mövcud boşluqların aradan qalxmasına və internet medianın dövlət yardımından bəhrələnməsinə imkan verəcək.
Sizin brauzer HTML5-i dəstəkləmir
Siyavuş Novruzovdan Facebook-la bağlı təklif
Ə.Amaşov həmçinin təklif edib ki, informasiya təhlükəsizliyi ilə bağlı qanunlara daha fundamental yanaşılsın, informasiya təhlükəsizliyi ilə bağlı ayrıca konsepsiya, yaxud da qanun qəbul olunsun.
Xatırlatma
Azərbaycanda internet mediası «Kütləvi informasiya vasitələri haqqında» Qanunla tənzimlənir.
1999-cu ildə qəbul edilmiş həmin qanuna indiyədək 77 dəfə dəyişiklik edilib. Həmin dəyişikliklərdən bir neçəsi məhz internet mediası ilə bağlı olub. 2001-ci ildə qanunun 3-cü maddəsinə edilmiş dəyişikliklə internet kütləvi informasiya vasitələri sırasına daxil edilib.
Həmin maddəyə görə, kütləvi informasiya vasitələri dedikdə, dövri mətbu nəşrlər, teleradio proqramları, informasiya agentlikləri, internet informasiya ehtiyatı, kinoxronika proqramları və digər yayım formaları nəzərdə tutulur.