Prezident İlham Əliyev avqustun 12-də “Azərbaycan Respublikasının 2020-ci il dövlət büdcəsi haqqında” Azərbaycan Respublikasının Qanununda dəyişiklik edilməsi barədə Qanunu təsdiq edib.
Bu sənəddə Azərbaycanın 2020-ci il dövlət büdcəsinin gəlirləri 24 124 000,0 min manat, xərcləri 27 492 200,0 min manat təsdiq edilib.
Bundan əvvəl isə ölkənin 2020-ci il dövlət büdcəsinin gəlirləri 24.134 milyard manat, xərcləri isə 26.894 milyard manat təsdiqlənmişdi.
2020-ci il üçün dövlət büdcəsində bir barrel neft $55 məbləğində hesablanmışdı. Hazırda dünya bazarında neftin bir barrelinin qiyməti 45 dollar civarında dəyişir.
Yeni təsdiqlənən sənəddə isə bu rəqəm 35 dollar götürülüb.
Azərbaycan Maliyyə Nazirliyi (MN) 2020-ci il dövlət büdcəsinə yenidən baxılması üzrə təkliflərini iyul ayının sonunda Nazirlər Kabinetinə təqdim etmişdi.
"2020-ci il dövlət və icmal büdcələrində ediləcək dəyişikliklərin əsas məqsədi əlavə müdafiə və təhlükəsizlik tədbirlərinin görülməsi üçün ehtiyatın formalaşdırılması, ...habelə pandemiyadan (koronvirus pandemiyası) zərər çəkən iqtisadi fəaliyyət sektorlarına, sahibkarlıq subyektlərinə və eləcə də əhalinin həssas qruplarına göstərilən dövlət dəstəyinin davam etdirilməsi üçün əlavə maliyyə təminatının yaradılmasıdır. Eləcə də, məqsəd sadalanan səbəblərdən ilin ikinci yarısında dövlət büdcəsinin artan xərcləri ilə azalan gəlirləri arasında gözlənilən natarazlığın aradan qaldırılması vəzifələrini təmin etməkdən ibarətdir" onda MN bildirirdi .
Sonra Nazirlər Kabineti layihəni bəyənərək Milli Məclisə göndərmişdi. Parlament də 3 günlik müzakirədən sonra layihəni qəbul etmişdi.