Britaniyanın AstraZeneca şirkəti Oksford Universiteti ilə birlikdə hazırladığı vaksinin təsdiqlənməsi üçün Avropa Birliyinə müraciət edib.
Avropa Tibb Agentliyinin (ATA) yanvarın 12-də bildirməsinə görə, müraciətə sürətlə baxılacaq və şərti marketinq icazəsi üzrə rəy yanvarın 29-dək verilə bilər.
Buna da bax: Kütləvi immunitet bu il yaranmayacaq
Vaksin Amsterdamda mənzillənən qurum və daha sonra Avropa Komissiyası tərəfindən rəsmən təsdiqlənərsə, 27 üzvü olan Avropa Birliyində koronavirusa qarşı üçüncü peyvənd olacaq. Bundan öncə Pfizer-BioNTech və Moderna şirkətlərinin vaksinləri təsdiqlənib.
Avropa Birliyi və ATA koronavirusa qarşı yeni vaksinləri sürətlə təsdiqləməyə çalışırlar. Pandemiya qitədə 620 mindən çox insanın həyatına son qoyub.
“Yaxşı xəbər”
Avropa Komissiyasının Prezidenti Ursula von der Leyen AstraZeneca-nın müraciətini “yaxşı xəbər” adlandıraraq deyib: “Vaksin müsbət elmi rəy alan kimi onun Avropada istifadəsinə icazə verilməsi üçün sürətlə işləyəcəyik”.
Good news! @AstraZeneca has applied to @EMA_News to have its vaccine authorised in the EU. @EMA_News will assess the vaccine’s safety & efficacy.Once the vaccine receives a positive scientific opinion, we will work full speed to authorise its use in Europe.
— Ursula von der Leyen (@vonderleyen) January 12, 2021
O, başqa bir tvitində yazıb ki, indi AB üzvləri Pfizer-BioNTech və Moderna vaksinlərindən “300 milyonadək əlavə doza ala bilərlər”.
We make sure Europeans have sufficient doses of safe & effective #COVID19 vaccines. We now enable EU countries to buy more doses of the 1st vaccine approved in EU. They can now buy up to 300 million more doses of the #BioNTech/@Pfizer vaccine.https://t.co/vjZd0L17VL
— Ursula von der Leyen (@vonderleyen) January 8, 2021
AB-nin şərti marketinq icazəsi bir müalicənin blok ərazisində bir il ərzində satılmasına yol açır, bu müddətdə onun effekti və yan təsirləri haqda gərəkən bütün informasiya yığılır.
Oksford-AstraZeneca vaksini artıq Argentina, Britaniya və Hindistan daxil olmaqla bir sıra ölkələrdə təsdiqlənib.
Bu vaksinin istehsalı rəqiblərindən daha ucuz başa gəlir, saxlanması və daşınması Pfizer-BioNTech vaksinindən xeyli asandır.
Buna da bax: Rusiya Sputnik V vaksininin ‘yüngül variantını’ hazırlayıb
Qadağa uzadıldı
Bu arada Rusiya Britaniya ilə uçuşlara qadağanı fevralın 1-cən uzadıb. Səbəb Britaniyada koronavirusun yeni ştammının aşkarlanmasıdır.
Rusiya hökumətinin koronovirusla mübarizə üzrə işçi qrupu yanvarın 12-də bildirib ki, dekabrın 22-dən tətbiq olunan qadağa “ictimai səhiyyəni qorumaq” məqsədi daşıyır.
Rusiya dünyada COVID-19-a yoluxmalar üzrə dördüncü yerdədir. İki gün öncə yeni ştamma ilk yoluxma qeydə alınıb, Britaniyadan qayıtmış şəxsin virusa yoluxduğu bildirilib.
Yanvarın 12-nə olan məlumata görə, Rusiyada 3 milyon 450 minə yaxın yoluxma təsdiqlənib, onlardan 63 minə yaxın xəstə vəfat edib.