Jurnalist Aytən Məmmədova iyunun 14-də axşam Bakı şəhər Baş Polis İdarəsinə çağırılaraq ona hücumla bağlı istintaqın əldə etdiyi nəticələr barədə məlumatlandırılıb. Jurnalistin AzadlıqRadiosuna verdiyi məlumata görə, ona əməliyyat-istintaq tədbirlərinin intensiv davam etdiyi bildirilib.
Məmmədovaya qarşı hücumla bağlı başlanmış cinayət işinin istintaqı Bakı şəhər Baş Polis İdarəsində aparılır. Əməliyyat-istintaq qrupunun rəhbəri isə idarənin rəis müavini Vüqar Ələkbərovdur.
Jurnalist deyir ki, son 15 gündə istintaqın gedişi, cinayətin açılması istiqamətində işlərin davam edib-etməməsindən xəbərsiz idi, ona bu barədə heç bir məlumat verilməmişdi: "Mənə bildirildi ki, əməliyyat-istintaq tədbirləri dayandırılmayıb, müxtəlif istiqamətlərdə işlər görülür. Müxtəlif məkanlarda kamera görüntülərinin incələnməsindən tutmuş, izlənmə, başqaları tərəfindən mənimlə bağlı məlumatların ötürülməsinə qədər müxtəlif məqamlar araşdırılır. İndiyə qədər atılan addımlar barədə məlumatlar çatdırıldı".
"Rahatlıq tapmağım üçün bu, çox vacibdir"
Məmmədovanın sözlərinə görə, Vüqar Ələkbərov əməliyyat-istintaq qrupunun üzvlərinə bundan sonra görüləcək işlər və istiqamətlərlə bağlı da tapşırıqlar verib.
"Mənə bildirildi ki, cinayəti törədən şəxs və ya şəxslərin tapılması üçün nə lazımdırsa, olunacaq, bu cinayətin üstünün açılması polisin özünün də marağındadır. Mən də açılacağına ümid edirəm, çünki rahatlıq tapmağım üçün bu, çox vacibdir", – jurnalist belə deyir.
Hadisə mayın 8-də gecə saat 23.50 radələrində Aytən Məmmədovanın yaşadığı binanın liftində baş verib. Naməlum şəxs kəsici aləti jurnalistin boğazına dirəyərək ondan "ağıllanmağı" tələb edib, əks halda, övladının həyatıyla təhdid olunub.
Jurnalistə qarşı hücumla əlaqədar CM-in 134-cü (öldürməklə və ya sağlamlığa ağır zərər vurmaqla hədələmə) maddəsiylə cinayət işi başlanıb.