Yunan-Roma güləşi üzrə dəfələrlə Azərbaycan çempionu və beynəlxalq turnirlərin qalibi olmuş Rəvan Həkimov şərləndiyini deyir. O iddia edir ki, özünə də məlum olmayan səbəbdən Nizami rayon Polis İdarəsinin əməkdaşları cibinə narkotik atıb, saxta ittihamla həbsə göndəriblər.
24-yaşlı Həkimov doqquz aydır ki, həbsdədir. Cinayət işinin materiallarında iddia olunur ki, onun cibindən 3.9 qram heroin tapılıb. Buna görə CM-in 234.4.3 (satış məqsədilə külli miqdarda narkotik əldə etmə, daşıma, saxlama) maddəsi ilə ittiham verilib.
"Dedi ki, "hörmətlə get, yoxsa pis olacaq""
Ancaq idmançı özü deyir ki, yalandır, onun cibində narkotik olmayıb. Kafedə yemək sifarişinin gəlməsini gözlədiyi vaxt iki nəfər mülki geyimli şəxs ona yaxınlaşıb. Həkimovun sözlərinə görə, polislər ona deyib ki, Nizami rayon Polis İdarəsinin cinayət-axtarış şöbəsinin rəisi Firdovsi Hüseynəliyev onu görmək istəyir. Onu 23-cü bölməyə aparıblar. Həmin vaxta qədər Hüseynəliyevi ümumiyyətlə tanımadığını vurğulayan idmançı deyir ki, etiraz etmədən polislərlə gedib.
Buna da bax: 'Dedim ki, silah ittihamı verin, boynuma götürüm...'Məhkəmədə ifadəsində bildirib ki, onu öncə 23-cü polis bölməsinin rəisinin kabinetinə aparıblar. Polis rəisi onu narkotik satdırmaqda ittiham edib. O isə cavabında bu iddianın yalan olduğunu söyləyib. Deyir ki, polis rəisi cavabından əsəbiləşib və onu aparmaq göstərişi verib: "Birinci mərtəbədə bir otağa gətirib, üstümü yoxladılar. Təxminən yarım saat sonra yenə rəisin otağına apardılar. Bu dəfə Firdovsi də orada idi. Firdovsi dedi ki, "səni narkotiklə bağlayırıq". Başa düşdüm ki, məni "yükləyirlər". Ona da dedim ki, narkotikin necə olduğunu heç bilmirəm. Qayıtdı ki, "Rəvan, sən yaxşı oğlansan, amma getməlisən". Dedim ki, "Allah baxır, niyə məni bədbəxt edirsiz?". Hirsləndi, dedi ki, "hörmətlə get, yoxsa pis olacaq"...".
Hədələndiyini, döyüldüyünü deyir
Həkimov bildirib ki, narkotik ittihamını üzərinə götürmək istəmədiyinə görə öncə hədələnib, daha sonra döyülüb. Onun sözlərinə görə, atası və qardaşını da gətirib narkotik ittihamıyla həbsə göndərməklə hədələyiblər. Bu üzdən çarəsiz qalıb, etiraf ifadəsinə imza atıb.
Buna da bax: Qarabağ müharibəsi iştirakçısı: 'Butulkayla hədələdilər...'İlkin ifadədə yazılıb ki, cibindəki narkotiki zibilliyin yanından tapıb, özü istifadə etməsə də, istifadəçi olan tanışlarına pay vermək niyyətiylə götürüb saxlayıb.
İdmançı vurğulayıb ki, bu ifadəni videokamera qarşısında da danışmasını istəyiblər: "Videoçəkilişin alınmayacağını görüb iki nəfər hal şahidinin iştirakıyla sənədləşmə apardılar".
Rəis bölmədə olduğunu təsdiqləyib, amma...
23-cü polis bölməsinin əməkdaşları isə bildirib ki, Rəvanın narkotik maddələrin dövriyyəsi və satışıyla məşğul olması haqda əməliyyat məlumatı almışdılar. Həmin məlumat əsasında da onu saxlayıblar. Onun əynindəki cins şalvarın cibindən heroin tapılıb.
Nizami rayon Polis İdarəsinin cinayət-axtarış şöbəsinin rəisi Firdovsi Hüseynəliyev həmin gün 23-cü polis bölməsinə getdiyini etiraf edib. Lakin o, bu gedişin Həkimovun tutulmasıyla əlaqəsi olmadığını deyib. O bildirib ki, Həkimovu bölməyə də o çağırtdırmayıb: "Mən həmin vaxt ora xidməti zərurətlə əlaqədar getmişdim. 23-cü bölmənin rəisi Emin Çələbiyevin otağında olanda təhqiqatçı gəlib Rəvan Həkimovun saxlanması və narkotik tapılması haqda rəisə məruzə elədi. Məruzədən sonra mən protokol və Rəvanla tanış oldum...".
Buna da bax: Mal əti narkotik hesab olundu, 1 il sonra bəraət aldıNarkotiki kimə satacağını müəyyənləşdirə bilməyiblər
Həkimova satış məqsədilə narkotik daşıma ittihamı verilsə də, onun narkotiki kimə satacağını istintaq müəyyənləşdirməyib. Cinayət işinin materiallarında yazılıb ki, onun narkotiki kiməsə satması və ya pay verməsini müəyyənləşdirmək mümkün olmadı.
Həkimovun yaxınları onun saxta ittihamla həbs olunması, işgəncəyə məruz qalmasından müxtəlif dövlət orqanlarına, o cümlədən prezidentə şikayət məktubları göndərib.
Həkimovun adı bir müddət öncə başqa bir narkotik işində keçirdi. Narkotik satışında ittiham olunan Zaur Əhmədovun məhkəməsində şahid kimi dindirilən Həkimov Əhmədovu dini inanclı, xeyirxah biri kimi tanıdığını deyirdi. Hakim bildirib ki, o, istintaqa ifadəsində Əhmədovun cibindən narkotik maddə çıxdığını etiraf edib. Amma Həkimov bunu təkzib edib, belə bir ifadə vermədiyini söyləyib. O, məhkəmədə Əhmədovun üzünə durmadığına görə incidildiyini də iddia eləmişdi.
Bu iş Bakı Ağır Cinayətlər Məhkəməsində araşdırılıb. Hakimlər idmançıya verilən narkotik satışı ittihamının təsdiqini tapmadığı qənaətinə gələrək ittiham maddəsini dəyişib. Ona qarşı irəli sürülmüş ittiham CM-in 234.4.3 maddəsindən 234.1 (satış məqsədi olmadan narkotik əldə etmə, daşıma, saxlama) maddəsinə tövsif edilib. İyunun 6-da çıxarılan hökmlə ona 2 il azadlıqdan məhrumetmə cəzası kəsilib.