Binəqədirayonu, Azadlıq prospektində 16-mərtəbəli binada 15 nəfərin öldüyü yanğına görə həbs olunanların təxminən 7 milyonluq əmlakı müsadirə olunmuşdu. Məhkəmənin hökmündə yazılmışdı ki, yanğından zərərçəkənlərə dəymiş ziyanın ödənilməsi, binanın təmiri dövlət hesabına həyata keçirilib. Ona görə də həmin əmlaklar hərracda satılıb, əldə olunan vəsait dövlətə ödənilməlidir.
Bir neçə ildir ki, üzərində həbs olan əmlaklar arasında Bakının Mərdəkan, Hökməli qəsəbələrində, Gəncədə, Göygöldə hektarlarla torpaq sahələri, fərdi yaşayış evləri və mənzillər, çoxsaylı minik və yük avtomobilləri vardı.
AzadlıqRadiosunun əldə etdiyi məlumata görə, sözügedən əmlakların hamısı sahiblərinə qaytarılıb. Bu barədə Ali Məhkəmə qərar qəbul edib.
Buna da bax: Yanğına görə həbs olunan şirkət rəhbəri buraxılıbYanğına görə səkkiz nəfər məhkum edilsə də, onlardan ancaq üçü Ali Məhkəməyə şikayət verib. Bunlar binanı poliuretan materiallarla üzləmiş «Global Construction» və həmin üzlükləri buraxmış «Global Stone» şirkətlərinin təsisçisi Miryusif Mahmudov, onun bacısı oğlu, «Global Stone»nun baş direktoru Uğur Bəşirov və Binəqədi Rayon İcra Hakimiyyəti başçısının sabiq birinci müavini Qəzənfər Novruzovdur.
M.Mahmudov və U.Bəşirov həm bəraət, həm də əmlakları ilə bağlı müsadirə qərarının ləğvini istəmişdilər. Q.Novruzov isə şikayətində ancaq əmlak məsələsini qoymuşdu. Onun dördillik cəzası artıq başa çatıb. Ali Məhkəmə təkcə bu üç nəfərin yox, şikayət verməyən, amma əmlakı müsadirə olunanların da məsələsinə öz təşəbbüsü ilə baxıb. Bütün əmlakların üzərindən həbsin götürülməsi və sahiblərinə qaytarılmasına qərar verilib.
Bu işdə müdafiə hüququnu həyata keçirən vəkillərdən biri də xəbəri təsdiqləyib.
Buna da bax: Binəqədi yanan bina işi: 'O binanı yandırıblar...'Xatırlatma
15 nəfərin öldüyü, 50-yə yaxın adamın xəsarət aldığı yanğına görə adları çəkilən üç nəfərdən əlavə, 2012-2013-cü illərdə Binəqədi Rayon Mənzil Kommunal Təsərrüfat Birliyinin rəisi, daha sonra icra hakimiyyətinin Təsərrüfat şöbəsinin müdiri olmuş Ədalət Rəcəbov, 72 saylı Mənzil-İstismar Sahəsinin sabiq rəisi Nizami Quliyev, «Global Stone» şirkətində işləmiş Ələkbər Əsgərov, poliuretan məmulatlarının sınaq yoxlamalarını keçirən «Dərnəgül Boru Zavodu» QSC-nin sınaq laboratoriyasının müdiri işləmiş Ağacavad Məmmədov, Səhiyyə Nazirliyinin Gigiyena və Epidemiologiya Mərkəzinin sabiq baş direktoru Akif Əlibəyov da cinayət məsuliyyətinə cəlb olunmuşdu.
Bu yaxınlarda M.Mahmudov cəzasının yarısını çəkəndən sonra azadlığa buraxılıb.
Sözügedən yanğından sonra Bakıda poliuretan materiallarla üzlənmiş binaların hamısından üzlüklər sökülüb.