Üzü astarından betər 800 bina
Bəzi binaların üzlüklərinin sökülməsinə başlanıb. “Turan” informasiya agentliyi şəhərdə 800 belə binanın olduğunu hesablayıb. Xətai rayon icra başçısı deyib ki, 15 bina yenidən, həm də daşla üzlənəcək.
Turan yazır: "Məlumatlı mənbələrdən Turan-a daxil olan məlumata görə, Bakıda 800-ə yaxın yaşayış binası belə “alışan” üzləmə materialı ilə üzlənib. Üzləmə dörd növdədir və onlar hamısı bu və ya digər temperaturda yanır.
Paytaxtın icra hakimiyyətlərinə bütün bu binaların birinci mərtəbələrinin demontajına başlamaq və mümkün yanğının söndürülməsi üçün su ilə dolu yük maşınlarını hazır saxlamaq tapşırılıb.
Birinci mərtəbələrdən yuxarıda üzləmənin demontajı daha sonra – Birinci Avropa Oyunlarından sonra həyata keçiriləcək.
İstintaq orqanları binaların məhz bu materiallarla üzlənməsinə kimin və necə icazə verdiyinin araşdırılması ilə məşğul olacaq. Təqsirkarlar cinayət məsuliyyətinə cəlb ediləcək.
Yanğının səbəblərinə gəlincə, üzləmə materialının hazırki və bundan əvvəlki alışmasında diversiya versiyası az ehtimal olunur. İstənilən halda, baş prokurorun yanğının səbəbinin keyfiyyətsiz üzləmə materialı olması haqqında bəyanatı çox şeydən xəbər verir.
Bu işlər “Qlobal konstrakşn” şirkəti tərəfindən həyata keçirilib. Üzləmə materialının tədarükçüsü hələki məlum deyil. Bəzi məlumatlara görə, bu firma Beynəlxalq Bankın tərəfdaşı idi.
Lakin ən maraqlısı odur ki, bu şirkət kimə məxsusdur? Məlumatlı mənbənin sözlərinə görə, firmanın sahibi Azərbaycanın çox yüksək vəzifəli məmurunun kürəkənidir.
Belə hallarda çox vaxt olduğu kimi, firma sahibləri dərhal təsisçiləri dəyişir və məsuliyyətdən qaçır. Buna görə, bu halda ölkənin ali rəhbərliyinin necə davranacağı maraqlıdır – baş verənlərə prinsipial qiymət vermək istəyəcək, yoxsa “hədəfi” tapacaq? Bu sualın cavabı yaxın gələcəkdə aydın olacaq." -AzadlıqLive-da
"Bəzilərinin evi bankda girovda imiş"
Mayın 20-də yerli medianın başlıca mövzusu bir gün öncə paytaxtda baş verən yanğınla bağlıldır.
«Bizim yol» yazır: «Sakinlərin bir qisminin evləri bankda girovdadır, bəziləri də toya hazırlaşırmış. Kredit götürərək ailə həyatı qurmaq istəyən şəxslərin evləri gözlərinin qarşısında yanıb kül oldu». Media icmalı AzadlıqLive-da
Avropa Oyunları : daha bir qadağa
“Eurasianet.org” saytı 1-ci Avropa Oyunları ərəfəsində Bakıda tətbiq olunan qadağalara daha birinin əlavə olunduğunu yazır. Belə ki, yerli sakinlərin İçərişəhərdə foto çəkməsi qadağan olunub. Əslində, rəsmi olaraq, fotoçəkilişə qadağa yoxdur. Ancaq naməlum səbəblərdən polis və təhlükəsizlik işçiləri yerlilərin foto çəkməsinə mane olur.
“Ancaq deyəsən, bu yazılmamış qayda turistlərə aid deyil. “Turistlərə icazə verilir, ancaq vətəndaşlar İçəşəhər rəhbərliyinidən icazə almalıdır,” özünü Vüqar kimi təqdim edən təhlükəsizik işçisi deyib”.
İnternetdə yerləşdirilən qaydalara görə, fərdlər və ərazidəki abidələrin həvəskar çəkilişi üçün icazəyə ehtiyac yoxdur. Yazı müəllifi rəsmilərdən açıqlama ala bilməyib. Qərb mediasının icmalı AzadlıqLive-da
Plastik üzlüklü binalara keşikçi qoyulacaq
Turan informasiya agentliyinin məlumatına görə, Bakı meri Hacıbala Abutalıbov deyib ki, Bakıda çoxmərtəbəli binada baş vermiş yanğın təxribat ola bilər. O, çərşənbə günü jurnalistlərlə söhbətində bildirib ki, ölkə prezidenti plastik üzliklərlə üzlənmiş binalara gözətçilərin qoyulması barədə göstəriş verib. Onun sözlərinə görə, Bakıda belə binaların sayı 14-dür və bu binalardan “nümunə” götürüləcək.
Ekspertizanın nəticələrindən sonra üzlüyün sökülüb-sökülməyəcəyi barədə qərar veriləcək.
H.Abutalıbov jurnalistlərlə və evləri yanan sakinlərlə görüşündə keyfiyyəsiz üzlüklərin istifadəsinə görə kimin məsuliyyət daşıması, meriya da daxil olmaqla, dövlət orqanlarının bu cür uyğun olmayan materiallardan istifadəyə niyə razılıq verməsi ilə bağlı sualları cavablandırmayıb.
O yalnız bildirib ki, yanğın zamanı həlak olan 15 nəfərdən üçü Lökbatanda, ikisi Masazırda, biri Qubada, biri Sulutəpədə dəfn edilib. Binəqədi meyitxanasında iki cəsəd var. Bir nəfər isə Rəsulzadə qəbiristanlığında dəfn olunacaq.